Deputeti Lefter Maliqi në një intervistë për RTV Ora tha se i ka bërë thirrje Prokurorisë për drejtësi për viktimat e tërmetit të 26 nëntorit, duke e konsideruar vrasje me paramendim.
Ndërkohë e konsideroi enigmë dorëheqjen e kryebashkiakes së Durrësit, Valbona Sako duke vënë në pikëpyetje arsyen e saj se mori këtë vendim për shkak të deklaratës ku tha se ishte e kënaqur me rezultatin e 51 viktimave.
Maliqi shtoi se posti ju la nënkryetarit të bashkisë, i cili mbajti detyrën prej 11 vitesh, ndërkohë që bashkia është e para e akuzuar për dhënien e lejeve të ndërtimit.
Lefter Maliqi: “Drejtësi për viktimat dhe të dëmtuarit. Dihej që këto banesa ishin të pabanueshme dhe akoma nuk është gjetur kush dha firmën që banorët të hynin në banesa.
Kjo është vrasje me paramendim për shkak të lejeve të ndërtimit. Përgjegjësia është zinxhir.
I bëra thirrje policisë së shtetit dhe prokurorisë se janë prishur ndërtimet pa u bërë ekspertiza. Është enigmë dorëheqja e kryebashkiakes. Mund të kërkonte vetëm ndjesë, se këto të tjerët çfarë nuk kanë thënë. Kjo tregon se nënkryetari prej 11 vitesh është në drejtim ndërkohë që e para është bashkia e akuzuar. Pastrimi i parasë bëhet nga firmat e ndërtimit. Janë njerëz që para se të ndërtojnë nuk deklarojnë të ardhurat. “
