Arta Marku nuk e ka pritur largimin? Dokumenti që ngre “dyshime”

Nga Boldnews.al

Arta Marku duket se ka shpresuar deri në momentin e fundit se do të siguronte votat e deputetëve për një mandat të plotë në krye të Prokurorisë së Përgjithshme.

Burime nga institucioni i Akuzës bëjnë me dije për “Boldnews.al” se ish-kryeprokurorja e Përkohshme ka marrë sendet personale nga zyra vetëm mëngjesin e së Premtes, pak orë para se të zhvillohej ceremonia, në të cilën i dorëzoi detyrën “ish-shokut të klasës”, Olsian Çela.

Por, ky detaj teknik nuk është i vetmi që ngre dyshime se Marku ka pritur mbështetjen politike për të qenë në krye të Akuzës.

“Boldnews.al” ka siguruar një dokument, të nënshkruar nga Arta Marku në datën 4 Dhjetor 2019, vetëm një ditë para se Parlamenti do të zgjidhte mes kandidaturës së saj, Olsian Çelës dhe Fatjona Memçajt për të drejtuar Prokurorinë e Përgjithshme për 7 vitet e ardhshme.

Dokumenti është Udhëzim i Përgjithshëm nr. 8, dt. 04.12.2019 “Për garantimin e pavarësisë së prokurorit, marrëdhëniet ndërmjet tij me drejtuesin e prokurorisë dhe informimin në prokuroritë me juridiksion të përgjithshëm”.

Ky Udhëzim është një përmbledhje e dispozitave, të shpërndara në Kodin e Procedurës Penale, si edhe në legjislacionin që rregullon veprimtarinë rutinë të punës së prokurorëve dhe raportet hierarkike institucionale.

LEXO EDHE  ‘E keni gabim’/ Kaba: Rilindasit nuk pinë drogë, ata e thithin ose e tymosin

Pra, Arta Marku nuk ka pasur asnjë “urgjencë” për të miratuar këtë Udhëzim, pasi, edhe pa atë, prokurorët kanë njohuritë e mjaftueshme dhe aftësitë profesionale për të lexuar bazën ligjore që normon punën e tyre.

Por, ajo që bie në sy në këtë Udhëzim është pikërisht data e miratimit të tij-4 Dhjetor 2019, vetëm një ditë para se Parlamenti të zgjidhte emrin e Prokurorit të Përgjithshëm.

Miratimi i Udhëzimit forcon bindjen se Marku mund të ketë shpresuar për një mandat të plotë. Megjithatë, shpresat e saj u shuan kur, mëngjesin e së Enjtes, ditën e seancës plenare, grupi parlamentar i Partisë Socialiste, në maxhorancë në Kuvend, vendosi të mbështeste kandidaturën e Olsian Çelës për të drejtuar Prokurorinë e Përgjithshme.

Çela mori 101 vota pro, ku deputetëve të Partisë Socialiste iu bashkuan edhe disa nga “opozita e re”. Ndërkohë, Arta Marku mori vetëm 11 vota pro dhe 76 abstenime. Këto vota “të bardha”, me siguri janë të Partisë Socialiste, e cila ka zgjedhur të mos japë votë kundër Arta Markut, emrin të cilin e zgjodhën në mënyrë tërësisht anti-kushtetuese, në Dhjetor 2017.