Tërmeti i 26 nëntorit me magnitudë 6.4 të Shkallës Rihter shkaktoi 51 viktima disa qindra të lënduar dhe mijëra qytetarë i la pa banesë për shkak se i nxorri jashtë funksionit.
Tërmetit nuk i shpëtoi pa u dëmtuar edhe godina e Kryeministrisë, Kuvendit, Bashkisë së Tiranës, që pësuan të krisura të dukshme, ndërsa godina ku ndodhet Drejtoria e Përgjithshme e Doganave, doli jashtë funksionit.
Si për ironi, godina e Teatrit Kombëtar, për të cilën Bashkia e Tiranës dhe Qeveria, përmes Institutit të Ndërtimeve, janë shprehur se rrezikon shembjen, nuk ka pësuar gjë. Ajo i rezistoi lëkundjeve në shtator, por edhe në nëntor, dhe sot po shërben si një prej pikave ku po mblidhen ndihma për të prekurit nga tërmeti.
Lidhur me këtë, Aleanca për Mbrojtjen e Teatrit, e cila prej dy vitesh mbron godinën nga plani i Erjon Veliajt dhe Edi Ramës, për shembjen e saj, ka reaguar përmes një postimi në rrjet.
Postimi nga Aleanca për Mbrojtjen e Teatrit
Gënjeshtrat e €dit dhe €rionit i kanë këmbët e shkurtra!
Tërmeti me magnitudë 6.4 nuk ka kursyer godinat e institucioneve shtetërore. Drejtoria e Përgjithshme e Doganave ka dalë jashtë funksionit si pasojë e dëmtimeve të lëkundjeve të shkaktuara nga tërmetit i një jave më parë. Pasojat janë ndjerë në godinën e Kryeministrisë dhe Kuvendit duke shkatuar të krisura të dukshme.
Nga ana tjetër, godina e Teatrit Kombëtar nuk është prekur nga tërmeti i 26 nëntorit duke mos lënë as çarje më të lehta të suvatimit. Përkundrazi, ky objekt po përdoret për të mbedhur ndihma për të qytetarët që kanë mbetur pa shtëpi nga lëkundjet sizmike të 6.4 të shkallës rihter.
Thuajse dy vjet më parë, qeveria nisi përpjekjet për grabitjen e truallit të Teatrit nën justifikimin se godina nuk ishte stabël dhe rrezikonte shembjen.
