Tre persona janë arrestuar nga policia këtë mëngjes. Sipas informacioneve paraprake, këta persona ishin të shpallur në kërkim ndërkombëtar, pasi akuzohen për një sërë veprash penale. Arrestimi i tyre u bë në sajë të operacionit të koduar “Last call”, me qëllim ekstradimin drejt Italisë.
- Në prangat e policisë ka përfunduar G.B., 31 vjeç. Gjykata e Arezzos, Itali ka lëshuar ndaj këtij shtetasi urdhër-arresti ndërkombëtar për kryerjen e veprës penale “Trafikimi i narkotikëve, kryesisht të llojit kokainë kryer në bashkëpunim, në mënyrë të përsëritur”.
- Policia e Elbasanit kapi dhe arrestoi shqiptarin Dritan Kllogjeri, 34 vjeç. Gjykata e Firences, Itali e ka dënuar me 5 vjet burg për veprën penale “Krime seksuale”. Ky shtetas nga viti 2007 deri në 2012, në Firenzuola dhe Firenze e ka detyruar duke e kërcënuar dhe rrahur ish-gruan e tij për të kryer marrëdhënie seksuale.
- Ndërsa në rrugën “Hamdi Sina” në kryeqytet, u bë e mundur arrestimi, me qëllim ekstradimi i Ernest (Nasi) Kaçi., 45 vjeç, banues në Tiranë. Kaçi ishte shpallur në kërkim në 19 nëntor 2019. Autoritetet gjyqësore italiane kanë lëshuar urdhër-arresti më datë 28 tetor 2019, pasi Gjykata e Sienas, Itali e ka dënuar 45-vjeçarin me 12 vite burg për veprat penale “Vjedhja me dhunë” dhe “Mbajtja e sendeve të vjedhura”.
Procedurat e mëtejshme për ekstradimin e tyre drejt Italisë do të kryhen nga Zyra Kombëtare e Interpolit në Tiranë.
