Nga Boldnews.al
Kryebashkiakja e Durrësit, Valbona Sako, njoftoi dorëheqjen pas një shprehjeje të gabuar në media, ku u shpreh se “duhet të jemi të kënaqur që kemi vetem 50 viktima”.
Shprehja e rëndë e artikuluar nga kryebashkiakja e pasprovuar me politikën, nën tensionin e paaftesisë së saj për të përballuar situatën pas tërmetit, irritoi këdo qytetar që e dëgjoi në media e rrjete sociale.
Dorëheqja, në raste të tilla, është gjëja më e mençur në një shtet normal. Kushdo drejtues duhet të ruajë qetësinë e të mbajë përgjegjësinë për ato që thotë, por sidomos për ato që bën apo nuk bën.
E, në rastin e Sakos, njoftimi për dorëheqjen e saj, pavarësisht argumentimit të saj për “shprehjen e gabuar”, duket se lidhet me keq-menaxhimin e operacioneve të ndihmës për mijëra qytetarë durrsakë që kanë mbetur pa strehë e pa ushqim.
Raportime të shumta mediatike gjatë ditëve të fundit, por sidomos të të Shtunës, dëshmonin se strukturat qeveritare në terren janë të përfshira në një konfuzion të plotë.
Qytetarë të shumtë ankohen para objektivave të kamerave se presin me orë të tëra për të marrë ushqime apo batanije për t’u ngrohur në netët e tyre jashtë shtëpive të dëmtuara.
Kryeministri Edi Rama është vendosur në rolin e drejtuesit të operacionit në terren, pavarësisht se ai duhet të merret me hartimin e planeve për daljen nga emergjenca dhe minimizimin e pasojave.
Ai, i shoqëruar me kamerat e “ERTV” i shfaqet grupeve të të dëmtuarve, në një kohë që këta të fundit presin ndihmat nga strukturat bashkiake e jo batutat e pa-goditura të kryeministrit.
Gjithësesi, ky protagonizëm i tepruar i Ramës në terren, arriti të krijojë idenë tek banorët e tronditur se Ai është edhe zgjidhja, por edhe dështimi.
E, nën këtë frymë, shumë qytetarë të irrituar durrsakë nuk ia përtuan shprehjen “Rama ik” para kamerave të medias.
Mes “Rama ik” dhe nevojës për të minimuzuar sa të mundet dëmin në imazhin e kryeministrit, u gjet “zgjidhja”- doraheqja e Valbona Sakos, e cila, në prononcimin e parë publik pas tërmetit, bëri një gafë të rëndë në artikulim.
Sako dha dorëheqjen për “shprehje të gabuar”, ndërkohë që përgjegjësia e saj dhe e shefit të saj është shumë herë më e madhe tek keq-menaxhimi i situatës së pas-tërmetit.
Por, kryebashkiakja e Durrësit, Valbona Sako, dha dorëheqjen për nje frazë të pavend, njëlloj sikur ajo të ishte drejtuese e ndonjë Bashkie në Suedi!!!!
