Kreu demokrat Lulzim Basha ka urdhëruar strukturat e partisë që drejton që t’i qëndrojnë pranë qytetarëve të prekur nga tërmeti i 26 nëntorit, që shkaktoi 49 viktima dhe mbi 650 të plagosur, ndërkohë që disa qindra ndërtesa janë jashtë funksionit ose të dëmtuara.
Në udhëzimin që ka shpërndarë për strukturat e PD-së, Basha kërkon angazhimin në terren të të gjithë ish-deputetëve, anëtarëve të Kryesisë dhe Sekretariatet, veçanërisht në 6 zonat e prekura nga tërmeti.
PD ka ngritur 6 grupe pune që operojnë në terren në 6 zonat e evidentuara si më të prekurat nga tërmeti i 26 nëntorit.
Në udhëzimin e tij, kreu demokrat kërkon që secili prej ish-deputetëve, anëtarëve të kryesisë, drejtuesit e degëve dhe Sekretariatet të ndihmojnë sipas mundësive që kanë në përballimin e situatës, të evidentojnë nevojat e qytetarëve, dëmet që i janë shkaktuar në banesa.
“Asnjë dalje publike apo reagim personal për përdorimin politikisht të kësaj tragjedie”, mësohet se është urdhëri që Basha i ka drejtuar anëtarëve të strukturave drejtuese.
Gjithashtu ai ka kërkuar shmangien e protagonizmit, si dhe angazhimin konkret për të ndihmuar qytetarët e prekur nga fatkeqësia.
