Kryetari i Partisë Agrare Ambientaliste, Agron Duka, reagoi për platformën “Anti-KÇK” të prezantuar nga Kryeministri Edi Rama. Nëpërmjet një postimi në rrjet, Duka ironizoi Ramën duke deklaruar se ai recitoi sot teksa paraqiti platformën e plotë.
Sipas Dukës, luftën kundër korrupsionit dhe krimit të organizuar do ta bëjë Struktura e Posaçme Antikorrupsion dhe jo platforma e Kryeministrit.
“Pyetja që shtrohet është: A mund të luftojnë këta politikanë dhe zyrtarë të lartë të përmendur nga zoti de Raho, partnerët e tyre të botës së krimit? Përgjigja është e thjeshtë, JO! Kjo do të jetë detyra e SPAK-ut, të sapo ngritur, dhe jo e atyre që e vonuan ardhjen e kësaj dite të rëndësishme për ndëshkimin e krimit dhe korrupsionit.
Fundi i pandëshkueshmërisë kalon përmes kësaj strukture dhe jo nga recitimet e një individi që ka marrë përsipër më shumë role se dikur Bes Kallaku, nga prokurori te humoristi, nga gjykatësi tek artisti, nga politikani te gangsteri”, shprehet Duka në postimin e tij.
Lidhur me show e dhuruar nga Rama, Duka shkruan se ishte një spektakël, i paguar nga taksat e qytetarëve, ku Kryeministri foli sikur të ishte kandidat për kryeministër, dhe jo kryeministri i një vendi që prej ditës në të cilën ai po qeveris, njihet për më shumë korrupsion, më shumë krim të organizuar më shumë trafik ndërkombëtar droge.
“Mafiozët shqiptarë kanë krijuar lidhje me eksponentë të politikës dhe interesat e tyre po administrohen nga zyrtarë të nivelit të lartë’, – deklaronte pak ditë më parë Prokurori Kombëtar i Antimafias në Itali, Federico Cafiero de Raho.
Kjo është një e vërtetë e pamohueshme e cila dëshmon se ‘aleanca e qelbësirave’ është e ndërvarur, ka lidhje simbiotike. As krimi nuk mund të bëhej kaq i fuqishëm pa mbrojtjen politike, as kapja e shteti nga një parti nuk mund të bëhej kaq e thellë pa mbështetjen e krimit në fushatat zgjedhore”, shkruan Duka.
