Ylli Manjani, ish-ministër i Drejtësisë, ndan një tjetër mendim nga Presidenti Ilir Meta lidhur me zgjidhjen e krizës politike në vend. Ndërsa Meta i mëshon idesë së një referendumi për mbrojtjen e Kushtetutës dhe Republikës, Manjani shprehet se zgjedhjet duhet të jenë përparësi e përparësive.
Në këtë kuadër, Manjani shprehet se hapat e tjerë vijnë më pas.
“Rendin kushtetues të shkërmoqur tashmë e rivendos populli, pa asnjë dyshim.
Prandaj duhen thirrë sa më parë zgjedhjet politike në vend. Si fillim duhet rikthyer pluralizmi politik që ndan e balancon pushtetet.
Të tjerat vijnë natyrshëm.
Kjo është përparsi e përparsive!”, shkruan Manjani në rrjet.
Reagimi i ish-ministrit të Drejtësisë, vjen në një kohë kur Presidenti ka paralajmëruar të japë detaje mbi propozimin e tij për referendumin në mbrojtje të Kushtetutës. Meta gjatë ditëve të fundit është përfshirë në një debat të fortë jo vetëm me Kryeministrin dhe Rilindjen, Këshillin e Emërimeve në Drejtësi, por edhe me disa nga ambasadorët, që sipas tij mbështesin me qëndrimet e tyre Qeverinë.
Reagimet e forta të Metës erdhën pas një tentative për kapjen e Gjykatës Kushtetuese nga Kryeministri përmes KED. Ato u ashpërsuan pasi anëtari i Kushtetueses, Besnik Muçi, i dekretuar nga Kreu i Shtetit, nuk u kualifikua nga Vetting, ndërsa ambasadorët hodhën idenë që t’i kërkohej opinion Komisionit të Venecias për ngërçin e krijuar në Kushtetuese.
