Pas takimit me Besnik Muçin, Meta lajmëron “konferencë të jashtëzakonshme”

Zyra e shtypit pranë Presidencës ka lajmëruar një konferencë të jashtëzakonshme për mediat të Presidentit Ilir Meta, në ora 18:30. Meta pritet të flasë për zhvillimet e fundit lidhur me Gjykatën Kushtetuese.

Njoftimi vjen pas takimit të kreut të shtetit me Besnik Muçin, anëtarin e zgjedhur nga ai për në Kushtetuese, për të cilin KPA vendosi dje shkarkimin nga detyra.

Takimi
Burime zyrtare nga Presidenca thanë se, pas vendimit të KPA, “zoti Muçi e garantoi Presidentin Meta se do të mirëkuptojë çdo veprim të mëtejshëm të Gjykatës Kushtetuese dhe Presidentit të Republikës, për të vijuar procesin midis tyre në lidhje me plotësimin e vakancave në Gjykatën Kushtetuese”.

“Presidenti Meta ndërkohë është në pritje të njoftimit nga Gjykata Kushtetuese për të rishpallur menjëherë këtë vakancë për aplikim”, shtuan të njëjtat burime.

Letra e Besnik Muçit
Besnik Muçi, më herët gjatë kësaj të premteje, i ka dërguar një letër Kushtetueses, ku kërkon vendim lidhur me vazhdimin ose jo të detyrës.  Në letër, Muçi shpjegon arsyet pse sipas tij vendimi i djeshëm i KPA për shkarkimin nga detyra nuk është i vlefshëm. “Procesi i rivlerësimit i nisur ex-officio në statusin dhe për funksionin e Prokurorit, nuk mund të vazhdonte dhe vendimi i Kolegjit të Apelimit nuk mund të ketë efekt ndaj funksionit dhe mandatit aktual të Gjyqtarit të Gjykatës Kushtetuese”, shprehet ai në letër. 

Në fund, Muçi kërkon vendimin e Kushtetueses, për të vijuar ose jo detyrën si anëtar i kësaj gjykate. “Pavarësisht sa më sipër, me qëllim për të ruajtur integritetin tim dhe të Gjykatës Kushtetuese të Republikës së Shqipërisë, lidhur me çështjen administrative të ushtrimit të detyrës, jam në pritje të njoftimit të vendimit të Gjykatës Kushtetuese për deklarimin ose jo të mbarimit të mandatit tim si Gjyqtar i Gjykatës Kushtetuese në përmbushje të detyrimeve të nenit 127 të Kushtetutës dhe nenit 9 të ligjit Nr. 8577, datë 10.02.2000 në një afat sa më të shpejtë të mundur”, thuhet në letër.

LEXO EDHE  Zjarr në Gjirokastër, digjen sipërfaqe të mëdha