Presidenti Ilir Meta zhvilloi takimin e rradhës me ish-Kreun e Shtetit, Bamir Topi, në kuadër të takimeve konsultative që po zhvillon për ngërçin dhe përplasjet lidhur me Gjykatën Kushtetuese.
Në përfundim të takimit, Topi ka zbardhur detaje nga biseda, ndërsa tha se gjithë kjo situatë, të cilën e cilësoi si “në pikën e hallit” ka lidhje me ndryshimet Kushtetuese të 21 Prillit 2008.
“Isha në këtë takim për t’u konsultuar rreth krizës institucionale, që ka të bëjë me Gjykatën Kushtetuese. Dëgjova me vëmendje Presidentin mbi argumentet e tij dhe biseda u zhvillua mbi logjikën politike e juridike.
Ish-Presidentët nuk janë aktorë institucionalë, ndaj mos mendoni se zgjidhja vjen nga aktorët jashtë institucioneve.
Ajo që mund të them sot është se kjo situatë në pikë të hallit është pasojë e prillit 2008, kur u miratuan ndryshimet kushtetuese.
Historia e përplasjeve institucionale është e trishtë, është e paprecedentë. Në 2008 me ndryshimet e miratuara, iu dha pushtet absolut Kryeministrit dhe mazhorancave dhe sot në Parlament kemi Kryeministrin, për problemet e administratës kemi po Kryeministrin, ndërsa Presidenti është kthyer në një institucion të parëndësishëm.
Me këto ndryshime të 2008-ës, u dezejkulibrua sjellja e institucioneve”, tha Topi.
Në vijim ai shtoi se palët që janë në përplasje të gjejnë vullnetin të gjejnë zgjidhje. “Duhet t’i japim zgjidhje institucionit më të rëndësishëm që është ngritja dhe vënia në funksion të Gjykatës Kushtetuese, tek e cila kërkojnë zgjidhje të gjitha institucionet e tjera, përfshi Kuvendin, Presidentin dhe Kryeministrin”, tha Topi.
Në kuadrin e konsultimeve, Presidenti Meta është takuar me ish-presidentët Rexhep Meidani, Sali Berisha dhe Bujar Nishani.
