Përplasjet mes Presidentit të Republikës në njërën anë dhe Kreut të KED-së, Ardian Dvorani dhe Rilindjes në anën tjetër, lidhur me Gjykatën Kushtetuese, vijojnë të prodhojnë meme dhe karikatura në rrjet.
Së fundmi, mjeshtri Kosta Raka ka publikuar karikatura, të publikuara në Telegraf, lidhur me përplasjet mes Metës, Dvoranit e Ramës.
Në karikaturën e parë, Meta shfaqet i ulur në karrigen e Presidentit duke i treguar Kushtetutën Edi Ramës, Taulant Ballës dhe Ardian Dvoranit.
Në një tjetër karikaturë, mjeshtri Raka paraqet Ramën dhe Dvoranin në tentativë për të kapur Kushtetuesen, ndërsa Meta i paralajmëron “ju që abuzoni në gjyq do përfundoni”.
Presidenti Ilir Meta një ditë më parë depozitoi kallëzimin penal ndaj Ardian Dvoranit në tre prokurori, atë të Tiranës, të Krimeve të Rënda dhe në Prokurorinë e Përgjithshme.
Sot Dvorani, deklaroi se Presidenti ka shfrytëzuar të drejtat e tij për t’a kallzuar penalisht, ndërsa tha se Prokuroria duhet të zbatojë ligjin pavarësisht se kush është kallëzuesi ose i kallëzuari.
Meta akuzon Dvoranin dhe Ramën se tentuan të kapin Gjykatën Kushtetuese duke shkelur procedurat e përzgjedhjes së anëtarëve të Gjykatës Kushtetuese.
Përplasja nisi, kur KED shpalli si anëtare të Gjykatës Kushtetuese, Arta Vorpsin, në një kohë kur Presidenti kishte kërkuar respektimin e rradhës për plotësimin e vakancës në Kushtetuese. Kështu referuar Kushtetutës, pas plotësimit të vakancës së parë nga Presidenti, i cili dekretoi Besnik Muçin si anëtar të Kushtetueses, rradha i takonte Kuvendit për të plotësuar vakancën e dytë, ndërsa vakanca e tretë plotësohej nga Gjykata e lartë.
