Meta takon kreun e KLP, Gent Ibrahimi: Të ngrihet pa vonesë SPAK

Presidenti i Republikës Ilir Meta priti sot në një takim Kryetarin e Këshillit të Lartë të Prokurorisë, Gent Ibrahimi, me kërkesën e këtij të fundit. Në njoftimin e shpërndarë për mediat nga zyra e shtypit e Presidencës, thuhet se “Kryetari i Këshillit të Lartë të Prokurorisë e informoi Kreun e Shtetit për hapat e mëtejshëm dhe koordinimin ndërmjet të gjithë institucioneve të përfshira në procesin e konstituimit të Prokurorisë së Posaçme”.

“Presidenti Meta e siguroi z.Ibrahimi për mbështetjen e pa kursyer në përmbylljen me sukses të procesit të ngritjes së Prokurorisë së Posaçme (SPAK).

Presidenti Meta i bëri me dije Kryetarit të KLP-së, se pavarësisht rezervave që ai ka patur në lidhje me zgjedhjen antikushtetuese të Prokurorit të Përgjithshëm të Përkohshëm dhe vonesat në krijimin e këtyre institucioneve të reja, do të mbështesë maksimalisht këtë proces në mënyrë që këto organe kaq të rëndësishme të drejtësisë penale të jenë sa më shpejt funksionale dhe që procedura e konstituimit të tyre të kryhet brenda një kohe sa më shpejt të jetë e mundur.

Në këtë drejtim Presidenti i Republikës do të përmbushë çdo detyrim që do t’i kërkohet sa më parë të jetë e mundur në përputhje me ligjin dhe frymën e Kushtetutës”, vijon njoftimi i Presidencës.

LEXO EDHE  Pompeo: Do t’u ndalojmë hyrjen në SHBA zyrtarëve të korruptuar

Më herët presidenti Ilir Meta priti në zyrën e tij ish-kryeministrin Sali Berisha, takim i zgjati rreth 35 minuta dhe u dominua me diskutime sa i takon krizës politike dhe përplasjeve me mazhorancën për Gjykatën Kushtetuese.