Organizata për Siguri dhe Bashkëpunim Europian organizoi sot në Tiranë një tjetër tryezë teknike për reformën zgjedhore, ku tema kryesore ishte financimi i partive politike.
Bashkëkryetarja opozitare e komisionit parlamentar të reformës zgjedhore, Rudina Hajdari, tha se “ekspertët e Këshillit të Europës dhe të NDI po japin disa sugjerime të vlefshme mbi transparencën e financimeve partiake, e po ashtu pjesëmarrja e partisë demokratike me propozimet e veta”. Ndërsa bashkëdrejtuesi tjetër i komisionit parlamentar të reformës zgjedhore tha se “në këto takime po mblidhen edhe shumë sugjerime nga ekspertë vendas dhe nga partitë politike të opozitës, madje rregullimi i financimeve zgjedhore mund të reformojë edhe vet forcat politike nga brenda”.
Opozita e bashkuar jashtëparlamentare ka tashmë platformën e saj “për çlirimin e zgjedhjeve nga krimi i organizuar”, ku sipas përfaqësuesit të partisë demokratike, Ivi Kaso, “propozohet mes të tjerash ulja e kostove të fushatave dhe financimi i partive plotësisht nga shteti”.
Por vëzhgues të shoqërisë civile ende janë skeptikë për suksesin e takimeve të tilla.
Drejtuesja e Shoqatës për Kulturë Demokratike, Gerta Meta, me një përvojë më shumë se dy dekada në vëzhgimin e proceseve zgjedhore, thotë se “këto takime përsëriten shpesh dhe thuhen të njëjtat gjëra, përsëri po humbet shumë kohë dhe ende nuk po dëgjohet një vullnet i qartë i partive për cështjet themelore, si depolitizimi i komisioneve zgjedhore, prekja e sistemit zgjedhor, përdorimi i teknologjisë apo votimi i emigrantëve”.
Një tjetër pjesëmarrës në tryezën e sotme është edhe pedagogu dhe veprimtari i Nismës Thurrje Endri Shabani. Ai thotë se “një grup individësh të pasur dhe grupe kriminale janë bërë aksionerë të partive politike dhe kanë më shumë pushtet brenda tyre sa anëtarët e thjeshtë. Dhe kjo mund të ndryshojë me ndryshmin e sistemit zgjedhor”.
Kryerja e reformës zgjedhore është edhe një nga kërkesat kryesore të ndërkombëtarëve, ndërsa palët janë angazhuar që mund ta përmbyllin atë përpara krishtlindjeve të këtij viti. /VOA/
