Zyrtare/ Franca ndaj Shqipërisë pa Coman, Deschamps: Duam vendin e parë në grup

Kombëtarja jonë do të presë mbrëmjen e nesërme Francën në stadiumin e ri “Air Albania”, që përkon edhe me sfidën e fundit të kualifikueseve të Euro 2020. Në kuadër të ndeshjes, përpara medieve kanë folur Raphael Varane dhe trajneri Deschamps, i cili ka konfirmuar një mungesë të madhe për ekipin e tij.

Kinsgsley Coman është i dëmtuar dhe nuk do të jetë në takimin e nesërm. Një lajm mjaft i mirë për Kombëtaren tonë, pasi një lojtar si Coman mund të hapte jo pak probleme.

Trajneri i Francës, Didier Deschamps ka theksuar në konferencën për shtyp se ekipi i tij vjen në Shqipëri për të siguruar vendin e parë. ”Shqipëria luan në shtëpinë e saj në një ndeshje hapëse inauguruese. Ata do të manifestojnë për traditat dhe vlerat sportive të tyre. Kanë lojtarë të mirë të një cilësie të lartë pasi luajnë edhe në kampionate apo skuadra të forta. Madje Franca është mposhtur një herë nga Shqipëria në Elbasan Arena me rezultatin 1-0″, – tha ai.

“Shorti është short, nuk mund të pretendoja një grup më të lehtë, apo më të vështirë. Por gjithsesi ne duhet të punojmë që t’i mundim të tjerët. Ne vijmë me synimin për të mbajtur vendin e parë në grup. Të gjithë lojtarët duan të luajnë nesër, por e rëndësishme është të luajnë ata që janë më në formë. Ndryshimet mund të ndodhin edhe pse kam pak kohë për të reflektuar por lojtarët që janë në fushë duhet të jenë në formë.Nuk mund të kemi një revansh për ndeshjen ndaj Moldavisë. Pjesa e parë ndaj tyre ishte e vështirë. Do luajmë ndaj një ekipi të motivuar nesër. Them se ekipi im do të bëjë një performancë të mirë”, – theksoi tekniku i “gjelave”.

LEXO EDHE  Edi Reja i sugjeron Udinezes të nënshkruajë me këtë lojtar shqiptar

Para trajnerit Didier Deschamps, në konferencën për shtyp për sfidën me Shqipërinë, doli mbrojtësi i Francës Raphael Varane. “Në ndeshjen me Moldavinë, në pjesën e parë ishim statikë, por na u desh të ndryshojmë. Nesër mendojmë të jemi më dinamikë në lojën tonë. Jemi të motivuar për ta fituar ndeshjen. Do të them që nesër ne do jemi të mobilizuar. Në ndeshje ndodh edhe të zhgënjehesh”, – tha Varane.

“Koha ka qenë e shkurtër dhe nuk kishim çfarë të ndryshonim. Nesër do tentojmë të kemi lëvizshmëri, të tentojmë topa të gjatë në thellësi, me qëllim të jemi më shumë në sulm”, – tha mbrojtësi.

“Unë mund të them, që duke qenë të parët, do të përballemi me ekipe të mira, por, le t’ia lemë të ardhmes. E konsiderojmë ndeshje të vështirë, pasi Shqipëria bën një lojë intensive në krah dhe preson shumë. Ndeshja nuk do jetë e thjeshtë. Fitorja në Paris na lehtësoi, por nesër nuk do jetë e lehtë. Duhet të luajmë fort, edhe Deschamps tha që do jetë një ndeshje e vështirë, pasi luajnë në shtëpinë e tyre dhe luajnë në inaugurimin e stadiumit të ri”, – theksoi Varane.