Në Gjykatën Kushtetuese jam si anëtare e saj. Kështu është shprehur Arta Vorpsi, e cila një ditë më parë preferoi të betohet para një noteri, pasi KED e përcaktoi si anëtaren e re të Gjykatës Kushtetuese, vendim që mbështetet edhe nga Rilindja në Kuvend.
Vorpsi shkoi pak përpara orës 08:00 të mëngjesit të sotëm në Gjykatën Kushtetuese, atje ku punon prej kohësh si këshilltare ligjore. Burime zyrtare nga Gjykata Kushtetuese i pohuan Boldnews.al se Vorpsi ka hyrë në zyrën e saj, atje ku edhe më parë ushtronte detyrën e Këshilltares.
Por në një reagim për mediat, ajo ka pohuar se ndodhet në Gjykatën Kushtetuese me cilësinë e anëtares së re.
Ndërkohë që Marsida Xhaferllari, e cila u dekretua nga Presidenti dhe dje u betua para tij, dhe Kryetares në detyrë të Kushtetueses, Vitore Tusha, ka marrë zyrtarisht sot detyrën e anëtares së re të kësaj gjykate. Madje raportohet se Xhaferllari ka hyrë në zyrën e saj.
Debati për anëtarët e Gjykatës Kushtetuese ka hyrë në një ngërç, që duket se u krijua për shkak se KED zgjodhi të çojë listat e kandidatëve për anëtarë njëkohësisht si në Presidencë ashtu edhe Kuvend. Madje listat përmbanin të njëjtët emra dhe të njëjtën renditje.
Në rastin e Presidentit, i cili më parë kishte plotësuar 1 nga 3 vakancat, duke emëruar Besnik Muçin si anëtar, KED zgjodhi variantin se i Kreu i Shtetit nuk u shpreh brenda afateve, dhe automatikisht vendi i vakancës plotësohej nga kryesuesja e listës, në rastin konkret Arta Vorpsi.
Ndërsa në rastin e Kuvendit, KED pranoi plotësimin e dy vakancave menjëherë. Pavarësisht se përcaktohet një rradhë në zgjedhjen e anëtarëve, Kuvendi brenda një seance preferoi të plotësonte dy anëtarët e tij, duke zgjedhur Fiona Papajorgjin dhe Elsa Toskën. Të dy këto të fundit u betuan pasditen e djeshme para Presidentit, duke marrë zyrtarisht detyrën sot. Ndërsa Vorpsi zgjodhi të betohej para një noteri, një veprim i paprecedent, që s’ka lidhje me Kushtetutën, para marrjes së një detyre.
