Deputetët e asaj që njihen si “opozita e re” kanë bashkuar votat me kolegët e Rilindjes për të miratuar një rezolutë kundër Presidentit Ilir Meta lidhur me situatën e krijuar në Gjykatën Kushtetuese.
Rezoluta e hartuar nga socialistët titullohet “shmangia e krizës kushtetuese me synim legjitimitetin e gjykatës kushtetuese – detyrë imperative e organeve më të larta të shtetit”.
Kjo nismë e Rilindjes erdhi si një përgjigje ndaj vendimit të Presidentit Meta, i cili nuk ka njohur Arta Vorpsin si anëtare të Gjykatës Kushtetuese.
Rezoluta është miratuar me 97 vota, në një kohë kur grupi parlamentar socialist ka 74 deputetë.
Ndërkohë që 4 deputetë kanë preferuar të abstenojnë.
Çfarë parashikon rezoluta
Sipas propozuesve të rezolutës, Presidenti i Republikës me veprimet e tij ka tentuar të bllokojë funksionimin normal të Gjykatës Kushtetuese. Presidenti i Republikës, sipas projektrezolutës, mori abuzivisht kompetencat e KED-it, pasi KED është organi i vetëm që përcakton renditjen.
Gjithashtu, thuhet se dekreti i Metës për Marsida Xhaferllarin është i pavlefshëm. Më tej, Kuvendi i Shqipërisë i bën thirrje Gjykatës Kushtetuese dhe organeve të tjera, që në kuadër të frymës zhbllokuese të Reformës në Drejtësi, të zbatojnë me përgjegjësi detyrat pa krijuar asnjë pengesë, për mundësimin e fillimit të detyrës së gjyqtareve kushtetuese, znj. Arta Vorpsi, znj. Elsa Toska dhe znj. Fiona Papajorgji.
Apeli drejtuar Presidentit
Kuvendi i Shqipërisë i bën thirrje Presidentit të Republikës të ushtrojë detyrat e tij kushtetuese në lidhje me fillimin e detyrës së gjyqtareve kushtetuese, znj. Arta Vorpsi, znj. Elsa Toska dhe znj. Fiona Papajorgji. Kuvendi i Shqipërisë i bën thirrje Gjykatës Kushtetuese dhe organeve të tjera, që në kuadër të frymës zhbllokuese të Reformës në Drejtësi, të zbatojnë me përgjegjësi detyrat, pa krijuar asnjë pengesë, për mundësimin e fillimit të detyrës së gjyqtareve kushtetuese znj. Arta Vorpsi, znj. Elsa Toska dhe znj. Fiona Papajorgji.
Kuvendi i Shqipërisë i bën thirrje Presidentit të Republikës të heqë dorë nga tentativat dhe aktet, që bllokojnë zbatimin e Reformës në Drejtësi dhe funksionimin normal të organeve kushtetuese, ku një prej më të rëndësishmeve është Gjykata Kushtetuese.
Kuvendi i Shqipërisë, në mënyrë të përsëritur i bën thirrje Presidentit të Republikës të reflektojë, duke e kthyer institucionin e Presidentit në kufijtë e kompetencave të njohura nga Kushtetuta dhe të mos ndërmarrë asnjë veprim tjetër në shkelje flagrante të Kushtetutës.
Kuvendi i Shqipërisë, në kuadër të frymës zhbllokuese të Reformës në Drejtësi, angazhohet të rishikojë legjislacionin për të penguar krijimin në të ardhmen të situatave që bllokojnë në mënyrë abuzive funksionimin e organeve kushtetuese të vendit.
