Një anëtar i Partisë Socialiste ishte i pranishëm në takimin që kreu demokrat, Lulzim Basha, ka zhvilluar në Sarandë. Ai nuk ka nguruar t’a pohojë se ka teserën e PS-së, që s’ka ndërmend t’a dorëzojë atë, por njëherazi që kërkon rotacionin e pushtetit.
“Teserën e Partisë Socialiste e kam unë, nuk e dorëzoj atë, por ne duam rotacion!”, u shpreh biznesmeni, që shkaktoi reagime me të qeshura ndër të pranishmit.
Basha ishte në Sarandë ku zhvilloi takimin e rradhës me operatorët turistikë që veprojnë në këtë qytet.
Biznesmeni e kërkoi me ngulm fjalën në takim, duke theksuar se ishte i majtë dhe i takonte të thoshtë dy fjalë, të ngrinte probleme.
Ai tha se quhej Zano Çulli dhe ngriti shqetësimin e madh të mungesës së infrastrukturës në Sarandë, që po çonte në varfërimin e qytetit dhe shitjen e banesave.
Çulli theksoi sesa i zhgënjyer kishte mbetur nga qeverisja e PS-së, duke filluar që nga emigracioni i detyruar i katër fëmijëve të tij me arsim të lartë e duke përfunduar te mashtrimi më i fundit i ish-ministrit Damian Gjiknuri, i cili “i vuri të hidhnin valle me Babanë e Teqesë” për rrugën e re që gjoja do të ndërtohej atje.
Po nuk munguan as akuzat e tij për firmën “Fusha” që po shkatërronte historinë e qytetit.
Ja çfarë tha socialisti Zano Çulli
“Na lejoni dhe ne që jemi të majtë, por ju kemi mbështetur, z.Basha, të themi dy gjëra.
Mirëseerdhe! Unë jam Zano Çulli, kryeplak i lagjes “Baba Rexhepi”. Me pesë fëmijë. Katër fëmijë me arsim të lartë m’i larguan nga Shqipëria. Jam marrë me biznesin e ndërtimit dhe jam edhe fermer. Jam njeri punëtor.
Biznesi i ndërtimit këtu në Sarandë ka kapitulluar, ku 70% e popullsisë punon në ndërtim. Janë 2 a 3 firma që leja e ndërtimit do të merret vetëm tek firma Fusha në Tiranë. Firma Fusha.
Po të them këtu se të vesh sot tek agjencia nuk gjen një punëtor, jo të ri. Dhe kemi vënë shtëpitë, e gjithë kurorë e qytetit është vënë në shitje se mungon infrastruktura, mungon uji, mungon rruga, kur këto vila janë bërë jetën në Greqi e nuk i shfrytëzojnë dot kur Sarandën e preferojnë tërë turistët e botës. I marrin turistët i çojnë në Syrin e Kaltër, rruga e paasfaltuar. Në Lëkurës po ashtu.
Ky qytet është drejt shkatërrimit.
Gjithë rrugët, shkallaret që bënë, rrëshkasin pleqtë. I shkulën gjithë historinë këtij qyteti. Tani do bëjnë një shëtitore; erdhi firma Fusha, që do të heqë ata gurë që janë dhe një foshnje e vogël do ikë nga karrocë e do bjerë nga shkallët drejt e në det.
Vjen firma Fusha me kazëm dhe me skrep dhe prish gjithë historinë e këtij qyteti.
Ne duam ta zgjerojmë këtë qytet. Unë jam në një lagje – foli shumë mirë ai për ndarjen administrative – ku teqeja e këtij qyteti është në territorin e Himarës!
Atje është sot. Vemi ne i kërkojmë për plazh, kam bërë shtëpi, kam investuar atje, por për të marrë plazhin, duhet ta marrësh në Himarë më thonë. Kjo ndarje administrative këtu është bërë gabim.
Lagja nr.4 e qytetit a do t’i kthehet qytetit bashkë me territorin që është? Po ta kërkoj ty!
E dyta, të ftoj të vizitosh Teqenë. Të ftoj hajde shikoje, vizitoje. Se këta erdhën e na sollën një projekt atje, Gjiknuri, – na vuri edhe me Babain e hodhëm valle, se po bëhet rruga – dhe na gënjyen!
Hajde shikoje se çfarë bëhet në gjithë rrugët e qytetit. E gjithë periferia është pa rrugë, kanë dalë shtëpitë në shitje.
Për këto jam ngritur unë. Vij nga e majta, teserën e Partisë Socialiste e kam unë, nuk e dorëzoj atë. Ta dish!
Basha: Mirë se ke ardhur! Ti ke ardhur si përfaqësues i biznesit, s’ke ardhur si përfaqësues i partive politike këtu.
Çulli: Mirë, po edhe politike do ta kthejmë një çikë, se nuk rri dot pa folur.
Basha: Dhe mirë se ke ardhur!
Çulli: Dhe të them edhe këtë gjë: të kemi mbështetur, vazhdo përpara, të gjithë jugun e ke me vete, duam rotacion!
