Nga Boldnews.al
Megjithëse Agron Hetoja u largua nga drejtimi i Autoritetit Kombëtar të Ushqimit (AKU) rreth 2 muaj më parë, praktikat abuzive të zhvilluara gjatë mandatit të tij vijojnë të aplikohen nga inspektorët e Ushqimit, ndërkohë që rastet korruptive të konstatuara nuk janë referuar pranë organeve kompetente.
“Boldnews.al” ka mësuar nga burime konfidenciale pranë Autoritetit Kombëtar të Ushqimit se, gjatë kohës që institucioni drejtohej nga Hetoja, janë raportuar dhe evidentuar një seri rastesh abuzive nga ana e vartësve të tij, gjatë inspektimeve në terren.
Por, të gjithë këto raste janë “mbyllur” brenda instituçionit, duke mos i raportuar ato as pranë Sektorit Kundër Krimit Ekonomik në Policinë e Shtetit dhe as në Prokurori. Madje, jo vetëm kaq, por të njëjtët persona, të çilat janë identifikuar në praktika abuzive, vijojnë të jenë ende në detyrë.
Të njëjtat burime të brendshme nga AKU informuar “Boldnews.al” se Agron Hetoja u largua nga detyra e drejtorit pikërisht për mos-reagimin ndaj rasteve flagrante, duke shtuar dyshimet se ai mund të ishte vetë pjesë praktikave abuzive.
Një seri denoncimesh të mbërritura në adresat e redaksive mediatike, përfshirë edhe “Boldnews.al”, ngrenë dyshimet për praktika korruptive që ndiqen nga inspektorë të AKU-së, kryesisht ish-bashkëpunëtorë të Agron Hetojas, gjatë kontrolleve në subjekte të ndryshme tregtare.
Bëhet fjalë për inspektorë ose veterinerë të institucionit, të cilët janë ngarkuar për marrjen e mostrave dhe analizimin e tyre, dhe që, në më shumë se një rast, janë kapur në falsifikim.
Pikërisht këto raste krijojnë dyshime të forta se njerëz të ish-drejtorit Hetoja po vijojnë “punën” për të goditur në mënyrë selektive biznese të ndryshme. Edhe pse këto raste tashmë janë të provuara, institucioni nuk ka marrë ende asnjë masë ndaj personave të kapur me shkelje.
Qeveria shqiptare, e çila pranoi propozimin e Ministrit të Bujqësisë Bledi Çuçi për shkarkimin e Agron Hetojas, nuk dha asnjë shpjegim zyrtar për largimin e tij nga detyra, vetëm 9 muaj pasi i ishte besuar drejtimi i Autoritetit Kombëtar të Ushqimit.
Argumenti zyrtar për shkarkimin e Hetojas ishte “një proces normal ristrukturimi” që pritet të përfshijë institucionet e sigurisë ushqimore, përfshirë edhe Institutin e Sigurisë Veterinare.
Por, ky argument formal nuk duket se përputhet me realitetin. Megjithëse janë bërë mbi 5 javë nga largimi i Agron Hetojas, nuk janë depozituar projekt-ligje mbi sigurinë ushqimore.
