Një ndodhi e padëgjuar është shënuar këtë të enjte me Arta Vorpsin, e cila është betuar te noteri si anëtare e Gjykatës Kushtetuese.
Sipas ligjit, për të marrë detyrën, kandidatët duhet të betohen te Presidenti. Neni 129 i Kushtetutës e përcakton qartë se “Gjyqtari i Gjykatës Kushtetuese fillon detyrën pasi bën betimin para Presidentit të Republikës”. Por duke hasur refuzimin e Metës, Vorpsi ka zgjedhur një rrugë krejt të pazakontë: betimin te noteri.
Betimi i gjyqtares Arta Vorpsi është kryer pranë noteres Miranda Xhemalçe pasi kreu i shtetit u shpreh se nuk do ta betonte Vorpsin si anëtare të Kushtetuese me pretendimin se me zgjedhjen e saj janë shkelur procedurat dhe Kushtetuta nga KED-ja. Pas kalimit në Kuvend, Arta Vorspi ka zgjedhur të “driblojë” Presidentin e Republikës, Ilir Meta i cili shfaqi rezerva të forta për hapat që ka ndjekur KED-ja në lidhje me këtë kandidate.
Për këtë veprim të ri, Arta Vorpsi, ka vënë menjëherë në dijeni Presidentin e Republikës, Këshillin e Emërimeve në Drejtësi si dhe Gjykatën Kushtetuese.
Për mazhorancën, Arta Vorpsi është anëtare e Gjykatës Kushtetuese, pasi Presidentit të Republikës i mbaroi afati 30 ditor që përcakton Kushtetuta për të zgjedhur kandidatin e tij të dytë. Ndërkohë, Meta një ditë më parë, dekretoi zgjedhjen e Marsida Xhaferllarit si gjyqtare të Gjykatës Kushtetuese.
Këtë të enjte, Kreu i shtetit zbardhi arsyet e dekretimit të Xhaferllarit ai anëtare e Kushtetueses dhe jo Arta Vorpsit. Meta thekson se parlamenti dhe KED kanë shkelur Kushtetutën në procesin për plotësimin e vakancave. Më tej, Presidenti vlerësoi figurën e Xhaferllarit, të zgjedhur nga ai anëtare e dytë e Kushtetueses, pas Besnik Muçit.
