Tenderi korruptiv/ Kush po e “varros” hetimin për DH-Albania

Nga Boldnews.al

Avdjol Dobi, 26-vjeçari, i cili, pa bërë thuajse asnjë punë në jetën e tij u shfaq si drejtuesi i kompanisë që fitoi tenderin 20 milionë euro të Unazës së Re dhe 8 milionë euro nga OST, është i vetmi i shpallur në kërkim nga autoritetet, për skandalin më të rëndë korruptiv të viteve të fundit.

Prokuroria e Tiranës nisi, me shumë sforco, në Dhjetor 2018 hetimin për tenderin, pas protestave të gjata të banorëve të Unazës së Re, si edhe zbulimit mediatik të dokumentave të falsifikuara nga “Dh-Albania”.

Pas këtij konstatimi, u zbulua se “DH-Albania”, me të njëjtët dokumenta të falsifikuara, kishte fituar edhe një tender, me vlerë 8 milionë euro, të zhvilluar nga Operatori i Sistemit të Transmetimit (OST), në Burrel

Hetimi u mor në dorë nga Prokuroria e Tiranës, e cila, në momentin e parë, pyeti disa ish-drejtues kryesorë të Autoritetit Rrugor Shqiptare (ARRSH), të cilët kishin shpallur fitues të tenderin 20 milionë euro kompaninë fiktive “Dunwell Haberman”, me seli në Dalaware të Shteteve të Bashkuara të Amerikës.

Me nisjen e hetimit, ish-ministri i Infrastrukturës së asaj kohe, Damian Gjiknuri, në varësi të të cilit ishin ARRSH dhe OST, gjithashtu një ndër personat e dyshuar për organizimin e tenderit korruptiv, deklaroi se “hetimi do të përfundonte shumë shpejt dhe përgjegjësit do të dilnin para ligjit”.

Por, kur kanë kaluar mbi 11 muaj nga nisja e veprimeve proceduriale, hetimi duket se ka mbetur në një pikë “të vdekur”. Nga ana e prokurorisë së Tiranës, nuk ka pasur asnjë veprim konkret.

LEXO EDHE  VIDEO/ Tërmeti shkatërroi kolonat e 7-katëshit, ekspertët e nxjerrin të banueshëm. Denoncimi i fortë

Argumentimi zyrtar për “bllokimin” e hetimeve është fakti që grupi hetimor është në pritje të një letër-porosie të dërguar drejt autoriteve amerikane për të marrë më shumë informacion mbi regjistrimin e “DH-Albania” në Dalaware.

Ky veprim procedurial, megjithëse jo shumë i nevojshëm, nuk është shkak që të bllokohet hetimet në Shqipëri, përfshirë administrimin e dokumentacionit dhe pyetjen e personave që mund të kenë dijeni ose të përfshirë në këtë tender.

Për më tepër, të gjithë dyshimet për falsifikimin e dokumentave mbeten brenda territorit të Republikës së Shqipërisë.

Nga të dhënat e bëra publike në media, përfshirë edhe komunikimin me autoritetet zyrtare amerikane, nuk rezulton që “DH-Albania” të ketë kryer veprime administrative në shtetin Dalaëare.

Nga ana tjetër, Prokuroria e Tiranës, ka dyshime të forta për falsifikimin e dokumentave në Shqipëri. Mbi bazën e këtyre dyshimeve, Prokuroria, në Janar 2019 kërkoi dhe mori mbështetjen e gjykatës së kryeqytetit për caktimin e masës së sigurisë “arrest me burg” për të riun Avdjol Dobi, i cili vijon të jetë në kërkim, pasi u është shmangur hetimeve.

Gjithashtu, ende nuk ka asnjë zhvillim hetimor për të zbuluar se cilët janë personat që kanë përfshirë djaloshin Avdjol Dobi në tenderat gjigandë e korruptivë të Unazës së Re dhe OST.