Projektligji për mediat, i njohur ndryshe si paketa antishpifje, është dërguar sërish nga qeveria në Kuvend, pa shumë reflektime. qeveria rama
Paketa e propozuar me ndryshime në muajin korrik të këtij viti pati kritika nga OSBE dhe organizatat ndërkombëtare për lirinë e medias. Por kërkesat dhe apeli i tyre duket se nuk patën shumë rezultat, pasi edhe me këto ndryshime të bëra, AMA mbetet një organ fuqiplotë në kontrollin e tregut të mediave elektronike në vend.
Në këtë projektligj të ndryshuar, kompetencat e Autoritetit të Mediave Audiovizive mbeten po të njëjtat sa u përket shkeljeve të pretenduara që mund të bëhen nga mediat online. Edhe me ndryshime e bëra, AMA mbetet organi që vendos për pezullimin e përkohshëm, deri edhe dhe heqjen e licencës, ndaj subjekteve mediatike. Ky organ do të ketë në dorë vlerësimin e shkeljeve të kryera nga mediat, të cilat mund të cilësohen si vepra penale. Gjithashtu, edhe sa i përket masës së gjobave që mund të vendosen nga AMA, nuk ka ndryshime substanciale, duke e lënë atë në gjykimin e Këshillit të Ankesave, organ pranë AMA-s.
“Në marrjen e vendimit, sipas shkronjës ‘a’ të kësaj pike, AMA, pasi dëgjon ofruesin e shërbimit të publikimeve elektronike dhe, nëse është e mundur, autorin e përmbajtjes së publikuar, vlerëson shkeljen e kryer në raport me cenimin e së drejtës së lirisë së shprehjes në përputhje me parimin e proporcionalitetit. AMA në bashkëpunim me AKEP merr vendim për bllokimin e aksesit në internet në rastet kur shërbimet e medias elektronike dyshohet se mund të nxisin kryerjen e një nga veprave penale në vijim: pornografi me fëmijë; inkurajimin e akteve terroriste; shkelje të sigurisë kombëtare”, thuhet në projektligj. Në këtë dokument të ndryshuar mbetet e njëjta pika për identifikimin e faqeve, të cilat dënohen një herë nga AMA për shkeljen e rregullave. Ndërsa regjistrimi dhe pronësia e mediave elektronike nuk bëhet me detyrim.
“Një person fizik a juridik, i cili ofron shërbime të publikimeve elektronike, mund të aplikojë tek AMA për regjistrimin dhe përditësimin e të dhënave të tij në Regjistrin e Ofruesve të Shërbimeve Mediatike. Ky identifikim nuk është parakusht për të ofruar shërbimin”, thuhet në projektligjin e ri.
Ndryshimi i vetëm në këtë dokument të ripunuar është pika ku u jepet e drejta mediave për të ankimuar vendimin e AMA në Gjykatë. Megjithëkëtë, edhe pas ankimit në Gjykatë, sipas ligjit të ri, nuk pezullohet vendimi i Këshillit të Ankesave.
Në verë, paketa antishpifje solli reagimin e përfaqësuesit të OSBE-së për Lirinë e Medias, Harlem Desir, i cili në atë periudhë i dërgoi edhe një letër kryeministrit Rama, duke shprehur shqetësimin e madh për përqendrimin e lartë të kompetencave tek Autoriteti i Mediave Audiovizive.
MASAT PËR SHKELJET
Në rastet e shkeljes së dispozitave të këtij ligji pas marrjes se mendimeve të organeve përgjegjëse, nëse parashikohen, AMA vendos:
a) detyrimin e ofruesit të shërbimit të medias: i. për të publikuar formulën e korrigjimit sipas formës dhe përmbajtjes së përcaktuar nga AMA; ii. për të vendosur nëpërmjet AKEP-it një njoftim të karakterizuar teknikisht si “pop up”;
b) për të vendosur gjobë, shuma e së cilës përcaktohet në përputhje me parashikimet e këtij ligji dhe të akteve nënligjore të tij;
c) për të vendosur pezullim të përkohshëm të licencës dhe/ ose autorizimit;
ç) për të vendosur uljen e kohëzgjatjes së vlefshmërisë së licencës dhe/ose autorizimit;
d) për të vendosur heqje të licencës dhe/ose autorizimit. AMA vendos sanksione të parashikuara në këtë ligj jo më vonë se një vit nga data e kryerjes së shkeljes. Kur AMA vëren shkelje të dispozitave ligjore, për të cilat me ligj vendosin sanksione organet e tjera shtetërore, atëherë ajo njofton këto të fundit.
Për shkelje të kryera nga OSHPE-të, për përmbajtjen e publikimeve elektronike, në bazë të një vendimi të marrë nga AMA, në vijim të procedurës së parashikuar në këtë ligj dhe pas marrjes së mendimit me shkrim nga AKCESK- u, Autoriteti i Komunikimit Elektronike dhe Postar (AKEP):
a) të bllokojë aksesin në internet në rastet kur shërbimet e medias elektronike dyshohet se mund të nxisin kryerjen e një nga veprave penale; pornografi me fëmijë, inkurajimin e akteve terroriste, shkelje të sigurisë kombëtare.
b) të vendosë një njoftim “pop up” në faqen e internetit/ domain-in e portalit i cili përmban informacion mbi vendimet e organeve vendimmarrëse të AMA-s./Panorama/
