Kryetari i Kuvendit, Gramoz Ruçi, kërkoi në nisjen e seancës parlamentare një mbledhje të Këshillit të Legjislacionit, lidhur me debatin mbi zgjedhjen e anëtarëve të Gjykatës Kushtetuese.
Ruçi tha se Këshilli i Legjislacionit duhet të diskutojë mbi bazën e dokumenteve dhe të konkludojë sesi do të veprohet me zgjedhjen e anëtarëve të Kushtetueses.
Ndërkohë edhe deputetja Rudina Hajdari i ka drejtuar një apel qoftë Presidentit ashtu edhe Kuvendit që të zgjidhin ngërçin e krijuar. Hajdari tha se zgjedhja e anëtarëve të rinj të Kushtetueses duhet bërë konform Kushtetutës, dhe kërkoi gjetjen e zgjidhjes.
Ruçi tha se për kandidaturat nuk do të ketë debat në Parlament, ndërkohë që tha se për shqetësimet e ngritura ka kërkuar që procedura të diskutohet më parë në Këshillin e Legjislacionit.
“Lidhur me shqetësimin që zonja Hajdari ngre, kam kërkuar që të mblidhet Këshilli i Legjislacionit për kushtetutshmërinë dhe votimin e kandidateve. Unë thash që nuk mund të diskutohet për kandidaturat, ato janë dëgjuar dhe seleksionuar nga Komisioni i Ligjeve. Janë diskutuar nga organi emërtesës që është KED-ja që ja çon Kuvendit, s’ka të drejtë të diskutuar për profesionalizimin e kandidateve, por vetëm të votojë”, tha Ruçi.
Zgjedhja e anëtarëve të rinj të Kushtetueses ka shkaktuar një përplasje mes Presidentit dhe Kuvendit, ndërsa Kreu i Shtetit i është drejtuar me një apel deputetëve që të respektojnë Kushtetutën.
KED depozitoi në Presidencë emrat e kandidatëve për një vend vakant, ndërkohë që të njëjtët emra janë edhe në Kuvend, për dy vendet vakante, që i takojnë Parlamentit për të zgjedhur anëtarët e Gjykatës Kushtetuese.
Deri më tani Gjykata Kushtetuese ka 1 anëtar, Besnik Muçin, të dekretuar nga Presidenti. Sipas asaj që përcakton Kushtetuta, anëtari i dytë duhej të zgjidhej nga Kuvendi, ndërsa i treti nga Gjykata e Lartë. Ndërkohë që Kuveni në rendin e ditës ka të përcaktuar zgjedhjen e dy anëtarëve njëherazi.
