Një tjetër person ka humbur jetën si pasojë e një aksidenti të ndodhur në Gjirokastër.
Aksidenti mësohet se ka ndodhur pas mesnatës në aksin rrugor që lidh lagjen Gerhot me rrugën nacionale në Gjirokastër.
Si pasojë e daljes së mjetit nga rruga, ka humbur jetën pasagjeri Julian Loloçi, 34 vjeç, ndërsa është plagosur Erlind Hysenaj,33 vjeç, i cili ishte drejtues i makinës.
Sipas policisë, automjeti tip “Benz” me drejtues shtetasin E.H., ka dalë nga rruga dhe është përplasur në një mur.
“Për pasojë ka humbur jetën pasagjeri që ndodhej në mjet, shtetasi J.L., 34 vjeç, banues në Gjirokastër dhe ka mbetur i plagosur drejtuesi i mjetit, shtetasi E.H., 33 vjeç, banues në Gjirokastër, i cili ndodhet në spital”, sqaron policia.
Paraprakisht dyshohet se drejtuesi i mjetit ka humbur kontrollin për shkak të shpejtësisë së tejkaluar.
Në vendngjarje shkoi grupi hetimor dhe po punon për zbardhjen e plotë të ngjarjes.
Në 24 orët e fundit kanë ndodhur 3 aksidente, që kanë shkaktuar 4 viktima, 3 prej të cilëve në Tiranë.
