Situata e krijuar prej më shumë se një viti me banorët e Unazës së Re ka shkaktuar probleme të mëdha jo vetëm për ta. Dhjetëra banorë janë ndaluar nga policia me akuzën e kundërshtimit të punonjësve të policisë, të tjerë janë shpallur në kërkim. Një ngjarje e fundit ndodhur në këtë zonë, ku u goditën me gurë punonjës të IKMT-së, e ka rënduar më shumë këtë situatë. Ndërkohë që banorët kanë pasur gjithmonë mbështetjen e Partisë demokratike.
Ish deputeti Klevis Balliu ndodhet pranë banorëve që prej ditës së parë të protestave. I ka mbrojtur në çdo formë. Ajo që kanë kërkuar dhe vazhdojnë ta kërkojnë këta banorë që preken nga projekti i Unazës së re është dialogu me qeverinë. Për këtë qëllim ka dalë në një deklaratë për mediat edhe ish deputeti Balliu.
Ai shprehet se Rama duhet të pres banorët për dialog dhe nuk duhet të dalë mbi parimin e Kombeve të Bashkuara.
Deklarata e Balliut
Edi Rama kërkon të shkelë parimin e Kombeve të Bashkuara për dëbimin duke dëbuar me dhunë qytetarët nga shtëpitë e tyre, pa tentuar të provojë as vlerën më bazike ne një shoqëri perëndimore- DIALOGUN.
Banorët e Unazës së Re kanë një vit që kërkojnë dialog me qeverinë, por EDI RAMA i refuzon, i përbuz, i kërcënon dhe i burgos. Në studimin e kryer, PNUD është krejtësisht i qartë kur tregon rrugën sesi duhet të zgjidhen mosmarrëveshje të njëjta me ato të banorëve të Unazës së Re.
Ligji ndërkombëtar i të drejtave të njeriut u kërkon qeverive që të hulumtojnë çdo alternative të mundshme përpara se të kryhet dëbimi, duke e konsideruar këtë si rrugë që shmang dhunën dhe përplasjen. Edi Rama refuzon të shohë alternativat, refuzon të dëgjojë banorët e Unazës së Re, sepse qëllimi kryesor është vjedhja me projektin e Unazës. Partia Demokratike i bën thirrje qeverisë të mos provokojë dhunë ndaj banorëve të Unazës së Re që janë në të drejtën e tyre legjitime për të mbrojtur shtëpitë nga shkatërrimi pa asnjë dëmshpërblim të drektë.
Partia Demokratike dënon çdo alt që shkelin të drejtat e njeriut dhe i kërkon qeverisë të zbatojë me përpikmëri ligjet e vendit dhe konventat ndërkombëtare. Dialogu me banorët e Unazës së Re është e vetmja rrugë që zgjidh këtë problematikë, shmang konfliktin, përplasjen dhe dhunën e padëshiruar!
