Forcat politike duhet të tregojnë vullnet për zgjidhjen e krizës politike që ka mbërthyer vendin.
Apeli është bërë nga bashkëraportuesit e Asamblesë Parlamentare të Këshillit të Europës, Andrej Hunko dhe Joseph O’Reilly, të cilët pak ditë më parë zhvilluan edhe një vizitë në Tiranë.
Në deklaratën e tyre, deputetët e Asamblesë Parlamentare të KiE, shprehen se Parlamenti është forumi për dialog dhe diskutim politik, dhe për këtë arsye bojkotimet dhe djegia e mandateve nuk duhet të kenë vend në një shoqëri demokratike.
Por gjithashtu, ata i kërkojnë Qeverisë që të angazhohet në dialog të mirëfilltë me opozitën për reformat e rëndësishme dhe sfidat politike me të cilat po përballet vendi.
Gjithashtu ata nxisin të gjitha forcat politike që të përmbahen nga çdo veprim që mund të rrisë tensionin dhe të minojë më tej pluralizmin politik në vend.
“Të gjitha forcat politike, përfshirë opozitën parlamentare dhe jashtëparlamentare, duhet të përfshihen plotësisht në procesin e reformës zgjedhore në mënyrë që të adresojnë mangësitë e shënuara gjatë zgjedhjeve të kaluara, dhe të vendosin një herë e përgjithmonë një kornizë për zgjedhje demokratike”, thuhet në deklaratën e bashkëraportuesve.
Deklarata
Pas një vizite në Tiranë, bashkëraportuesit e Asamblesë Parlamentare të Këshillit të Evropës (PACE) për monitorimin e Shqipërisë, Andrej Hunko (Gjermani, UEL) dhe Joseph O’Reilly (Irlandë, EPP / CD), u kanë bërë thirrje të gjitha forcave politike në Shqipëri të tregojnë vullnet politik për të zgjidhur krizën politike që ka pllakosur vendin.
“Ne ritheksojmë qendrimin tonë se parlamenti është forumi për dialog dhe diskutim politik, dhe për këtë arsye bojkotimet dhe djegia e mandateve nuk duhet të kenë vend në një shoqëri demokratike. Në të njëjtën kohë, mazhoranca në pushtet duhet të angazhohet në dialog dhe konsultim të mirëfilltë me opozitën për reformat e rëndësishme dhe sfidat politike me të cilat po përballet vendi, ” theksojnë dy bashkëraportuesit.
Për më tepër, ata nxitën të gjitha forcat politike që të përmbahen nga çdo veprim që mund të rrisë tensionin dhe të minojë më tej pluralizmin politik në vend. Ata mirëpritën mendimin e fundit të Komisionit të Venecias për dekretin e Presidentit për të caktuar datat e zgjedhjeve, i cili thotë qartë se megjithëse Presidenti “mund të ketë tejkaluar kompetencat e tij kushtetuese duke anuluar dhe shtyrë zgjedhjet lokale pa një bazë të veçantë ligjore” kjo do të sipas këndvështrimit të tij, nuk e garanton rolin e Presidentit. Bashkëraportuesit shprehen shpresë se të gjitha forcat politike do të merrnin parasysh këtë mendim, dhe përfundimet e tij.
Sipas mendimit të bashkëraportuesve, reforma zgjedhore e ndjekur nga zgjedhjet mund të jetë thelbësore për tejkalimin e krizës politike. Të gjitha forcat politike, përfshirë opozitën parlamentare dhe jashtë parlamentare, duhet të përfshihen plotësisht në procesin e reformës zgjedhore në mënyrë që të adresojnë mangësitë e gjetura gjatë zgjedhjeve të kaluara, dhe – një herë e përgjithmonë – të vendosin një kornizë ligjore për zgjedhje vërtet demokratike.
Bashkëraportuesit përshëndetën angazhimin e shprehur në mënyrë të përsëritur të autoriteteve për të reformuar gjyqësorin dhe sistemin e drejtësisë në Shqipëri. Në lidhje me Vettingun e gjyqtarëve dhe prokurorëve, bashkëraportuesit vunë në dukje numrin e lartë të shkarkimeve dhe dorëheqjeve si rezultat i këtij procesi. Ndërsa, ata shprehen të shqetësuar se, më shumë se një vit pas fillimit të procesit të vettingut, institucionet kryesore gjyqësore si Gjykatat e Larta dhe Kushtetuese, si dhe SPAK-u ende nuk ishin caktuar ose themeluar për shkak të mungesës së kandidatëve të verifikuar. Prandaj ata mirëpritën garancitë që këto institucione do të funksionojnë përpara fundit të këtij viti.
“Kjo është veçanërisht e rëndësishme sa i përket krijimit të Gjykatës Kushtetuese, e cila mund të luajë një rol të rëndësishëm në zbutjen e tensionit politik, pasi aktualisht nuk ka ndonjë arbitër të pavarur që të vendosë për kushtetutshmërinë e vendimeve dhe rezultatin e tyre nga autoritetet e ndryshme”, theksuan dy bashkëraportuesit.
Bashkëraportuesit ishin të shqetësuar nga sugjerimet e disa gazetarëve dhe OJQ-ve se mjedisi i mediave po përkeqësohet. Ata u bënë thirrje autoriteteve që të marrin parasysh të gjitha rekomandimet e bëra nga Përfaqësuesi i OSBE-së për Lirinë e Medias në lidhje me projektligjin për media dhe shërbime, dhe të publikojnë këtë projektligj sa më shpejt, në mënyrë që të hiqet çdo shqetësim se ligji mund të kufizonte lirinë e shprehjes në vend.
Bashkëraportuesit thanë do të paraqesin një shënim informues për vizitën e tyre gjatë takimit në dhjetorit në Komitetin e Monitorimit të PACE.
