Paratë publike/ “Flamujt e kuq” në tenderat e fituar nga Papuli i “Classic Volkswagen”

Nga Boldnews.al

Pjesa më e madhe e tenderave që ka fituar kompania “Classic” e Agron Papulit gjatë vitit 2019 janë në kufirin e atyre që platformat monitoruese të prokurimeve publike i konsiderojnë me “flamuj të kuq”.

Sinjali për tendera të dyshimtë ngrihet kur në konkurim merr pjesë vetëm një kompani ofertuese ose kur kushtet e tenderit i plotëson vetëm fituesi.

Boldnews.al” ka verifikuar të dhënat në Buletinët e Prokurimit Publik për 10 muajt e vitit 2019, në të cilën rezulton se “Classic” ka fituar të paktën 6 tendera, të cilat shënjohen me “flamuj të kuq”. Më poshtë, prezantohen në mënyrë kronologjike tenderat e fituar nga “Classic”, ku ka qenë ofertues i vetëm ose kur konkurentët e tjerë janë skualifikuar apo tërhequr nga gara.

1. Bashkia Mirditë
Në Mars 2019, Bashkia Mirditë shpall kompaninë “Classic” fituese të tenderit për “Blerje fuoristradë-Pick Up”, e cila ka ofruar vlerën 2.750.000 lekë (të reja).

Në këtë tender, siç raportohet në Buletinin e Prokurimit Publik të datës 25 Mars 2019, kompania “Classic” ka qenë pjesëmarrëse e vetme, pa konkurrent.

2. Shkolla e Magjistraturës
Në Qershor 2019, Shkolla e Magjistraturës shpall kompaninë “Classic” fituese të tenderit për blerjën e një automjeti, e cila ka ofruar shumën 3.700.000 lekë (të reja).

Në këtë tender kanë marrë pjesë dy kompani ofertuese, “Classic” dhe ‘Mektrin Motors”. Në bazë të të dhënave të publikuara në Buletin e Prokurimeve, datë 3 Qershor 2019, rezulton se “Mektrin Motors” është skualifikuar nga gara, për shkak se nuk ka plotësuar dokumentacionin e nevojshëm.

Gjithësesi, “Mektrin…” rezulton se ka ofruar ofertë më të lartë se sa “Classic”.

3. Bashkia Dropull
Bashkia jugore e Dropullit ka shpallur kompaninë “Classic” fituese të një tenderi për blerje automjetesh. Vlera e ofruar nga kompania në pronësi të Agron Papulit është 3.650.000 lekë (të reja).

Në bazë të të dhënave të Buletinit të Prokurimeve Publike të datës 3 Qershor 2019, kompania “Classic” ka qenë pjesëmarrëse e vetme në këtë tender.

4. Bashkia Tiranë
Në Korrik 2019, kompania “Classic” ka qenë pjesëmarrëse në një tender të zhvilluar nga Bashkia e Tiranës në Korrik 2019, për “marrje me qera operacionale automjete”. Në këtë tender, fitues është shpallur kompania “Tirana Auto”, e cila ofroi vlerën 160 milionë lekë (të reja).

LEXO EDHE  Avokati Altin Goxhaj lë spitalin dhe bën paralajmërimin e fortë: Tani fillon puna për...

Por, Departamenti Antikorrupsion në Partinë Demokratike, në një postim në profilin e tij zyrtar në “Facebook” ka hedhur dyshime se, fituesi i vërtetë i këtij tenderi është biznesmeni Agron Papuli.

Departamenti Antikorrupsion i PD-së, shkruante në atë kohë: “Dhe vijmë tek tenderat në modë: marrje me qira e automjeteve për nevoja të bashkisë, me vlera të konsiderueshme. Merr pjesë Papuli 1, Papuli 2 dhe Papuli 3 me tri shoqëritë e tij. Se në xhepin personal të kujt shkojnë 1,3 mld lekë të këtij tenderi, s’ka vend për pikëpyetje”.

Në këtë tender, krahas fituesit “Tirana Auto”, merrnin pjesë edhe “Classic”, “Hyundai Albania” e “Albania Car Rentals”.

Në bazë të të dhënave të Qendrës Kombëtare të Regjistrimit (QKR), biznesmeni Agron Papuli rezulton pronar vetëm tek “Classic”.

5. Mjekësia Ligjore
Instituti i Mjekësisë Ligjore ka shpallur fitues kompaninë “Classic” në tenderin e zhvilluar në Shtator 2019 për marrjen me qera të 3 automjeteve.

Në këtë tender kanë marrë pjesë “Classic” dhe “Albania Car Rentals”. Shoqëria ‘Classic” ka dhënë ofertën 3.834.000 lekë (të reja), e cila është më të lartë se sa konkurrenti tjetër.

Por, gjithësesi, “Classic” është shpallur fituese, për shkak se kompania tjetër është skualifikuar nga gara, si pasojë e mungesës së dokumentacionit.

6. OSSHE
Po në Shtator 2019, kompania “Classic” shpallet fituese e një tenderi të zhvilluar nga Operatori i Shpërndarjes së Energjisë Elektrike (OSSHE), për marrje me qera operacionale automjete”.

Në tender morën pjesë dy garues-“Classic” dhe “Hyundai Auto Albania”. Në përfundim të procedurës, autoriteti publik shpalli fitues kompaninë “Hyundai”, e cila kishte ofruar vlerën më të ulët-86.400.000 lekë (të reja).

Por, siç raportohet në Buletinin e Prokurimit Publik të datës 16 Shtator 2019, kompania fituese, “Hyundai” ka deklaruar zyrtarisht dorëheqjen.

Për këtë arsye, autoriteti publik shpalli fitues të tenderit kompaninë “Classic”, e cila ka ofruar vlerën 88.060.000 lekë (të reja).