Alvin Berisha, djali 11 vjeçar shqiptar, i cili ndodhej në kampin sirian të Al Hol, pritet të mbërrijë në aeroportin e Romës, rreth orës 07:30 të së premtes.
Lajmi bëhet i ditur nga mediat italiane, sipas të cilave Alvini do të shoqërohet në udhëtimin e tij drejt Italisë, nga miq të babait të tij.
“Nuk duhet të kesh frikë”, i ka thënë Afrim Berisha djalit të tij 11 vjeçar në një bisedë të shkurtër telefonike, ndërsa i biri i është përgjigjur “pa problem baba, po vij”.
Darien Levani, përfaqësuesi ligjor i familjes Berisha, thotë se “Alvini është mirë dhe presim me ankth fundin e kësaj odiseje që zgjat prej shumë vitesh”.
11-vjeçari humbi nënën e tij, Valbona, në një sulm ajror në Siri në vitin 2014, dhe prej atëherë ndodhej i vetëm.
Sikundër është raportuar, ai ka probleme të rënda në njërën këmbë.
Ai që e identifikoi fillimisht në kamp ishte Bedri Elezi, ish luftëtar i Ushtrisë së Kosovës. Elezi është një nga personat e angazhuar për të ndihmuar në kthimin në shtëpi të grave dhe fëmijëve të xhihadistëve të nga Ballkani.
