Presidenti francez, Emmanuel Macron, i cili u vendos në sulme dhe akuza, nga zyrtarë të qeverisë Rama dhe përfaqësues së Rilindjes, i ka qëndruar deklaratave të mëparshme lidhur me vendimin për mos-hapjen e negociatave me Shqipërinë dhe Maqedoninë e Veriut, në takimin e Këshillit Europian që u mbajt më 17-18 tetor.
Macron vuri veton, ndërsa u mbështet nga Holanda dhe Danimarka, që mbajtën një qëndrim të prerë, duke e argumentuar atë me mospërmbushjen e kushteve nga Shqipëria. Ndërsa në rastin e Maqedonisë së Veriut, vendimi negativ kishte lidhje me veton franceze, e cila gjykoi të gabuar ndarjen e procesit për dy vendet.
“Duhet të them se shumica e tyre ishin pro nisjes së negociatave me Maqedoninë e Veriut, por thuajse gjysma ishin kundër Shqipërisë. Gabim fatal”, ka deklaruar Presidenti Macron edhe në një intervistë për The Economist.
Presidenti francez duket i vendosur kundër zgjerimit, duke thënë se procesi është i pakuptimtë.
“Është absurde të hapësh një proces thjesht burokratik”, shprehet ai.
Madje, Macron mendon se edhe deklarimet se mos-hapja e negociatave mund të çojë në një rritje të ndikimit rus, kinez apo turk në Rajon nuk qëndron.
“U thashë atyre: ne kemi një problem. Nuk po na funksionon me 27 apo 28 anëtarë sot. A mendoni se do jetë më mirë nëse bëhen 32?”
Argumenti i dytë ishte se nëse nisin negociatat, anëtarësimi do bëhet pas 20 vitesh. Por Macron thotë se duhet të shohim unionin financiar, i cili ka 20 vite dhe nuk është reformuar.
Argumenti i tretë ishte se këto vende mund të bien nën ndikimin e Rusisë, Kinës apo Turqisë, nëse nuk hapen negociatat. Macron thotë se ka vende që kanë hapur negociatat, por janë nën këto ndikime.
“Kështu që bindja ime është se duhet të reformojmë procedurat, pasi ato nuk i shërbejnë këtij qëllimi”, shprehet Macron.
