Kreu i PDK-së, Kadri Veseli, ka bërë të ditur se ka marrë ftesë për intervistim nga Gjykata Speciale.
Veseli tha se do të intervistohet me 4 dhjetor në Hagë.
“Ashtu siç jam zotuar se në momentin që do ta kisha një ftesë të tillë unë do ta bëja publike, gjenerata ime si gjithë gjeneratat tjera ka përjetuar shtypjen e rëndë të vendit tonë, ne nuk jemi pajtuar me atë gjendje dhe unë jam krenar që iu jam përgjigjur thirrjes së vendit”, u shpreh Veseli në një komunikim me mediat.
Veseli shtoi se do të japë përgjegjësi të plotë për të gjitha angazhimet e tij në kohë të luftës.
“Edhe ky proces duhet të ketë epilog, duke u bazuar në të vërtetën, faktet e drejtësinë, dhe që nuk e dëmton shtetin e Kosovës në pafundësi.
Jam i bindur se edhe kjo Gjykatë do ta vërtetojë luftën e drejtë të Ushtrisë Çlirimtare të Kosovës, por edhe që do t’i ndalë goditjet ndaj të vërtetës së popullit tonë dhe Ushtrisë Çlirimtare të Kosovës. Unë do t’i përgjigjem kësaj ftese, më 4 dhjetor”, u shpreh Veseli.
