Kryeministri Edi Rama ka paralajmëruar sërisht gjyqtarë e prokurorë, që sipas tij janë pjesë e “kap ç’a të kapësh”, duke i cilësuar si organizatën më të rrezikshme kriminale në vend.
Rama paralajmëroi depozitimin në Kuvend të disa masave speciale ndaj anëtarëve të KÇK-së.
“Ata që e dinë që nuk do ta kalojnë vettingun janë lëshuar ‘Kap ç’a t’kapësh”. KÇK është organizata më e rrezikshme kriminale që vepron sot në vend sepse është e veshur me petkun e ligjit dhe funksionon si organizatë grabitësish ordinerë.
Për KÇK po bëhemi gati dhe siç e kam lajmëruar lidhur me krimin e organizuar paralelisht me një ligj special për ta çuar luftën kundër krimit të organizuar në një nivel tjetër të pandodhur kurrë më parë, do e çojmë në parlament disa masa speciale ndaj anëtarëve të KÇK-së.
Të gjithë do të shihni në praktike, jo fjalime rezultate e një ofensive frontale që qeveria do ndërmarrë ndaj krimit të organizuar apo KÇK-së”, u shpreh Rama.
Akuzat e Ramës janë të njëjta me ato që i drejtoi ndaj prokurorit Arjan Ndoj, të cilin e sulmoi nga salla e Kuvendit, pasi ky i fundit urdhëroi arrestimin e kreut të kadastrës së Durrësit, Liridon Pulës. Akuzave të Ramës ndaj Ndoj iu shtua edhe Erion Braçe, i cili madje nuk nguroi të shkonte në gjykatë, në kohën kur vendosej masa e sigurisë.
Pak ditë pas akuzave publike të bëra nga Rama, ndaj Ndoj u bë një atentat mafioz, ku ai dhe dy personat që e shoqëronin, mbetën të plagosur.
