Ish-ministri i Jashtëm, Ditmir Bushati, ka reaguar ashpër ndaj pr/rezolutës që po diskutohet në Komisionin e Jashtëm lidhur me ndërhyrjen ruse, e cila është paraqitur nga Partia Socialiste.
Rezoluta është paraqitur nga Taulant Balla, sipas të cilit të gjitha vendet e Europës Juglindore kanë shqetësimin e shtimit të financimeve të huaja, dhe ndikimit të tyre në zgjedhje në vende të treta.
Por ish-ministri Bushati referuar draftit të paraqitur tha se ai është i mbushur me gabime të shumta, si në përmbajtje ashtu edhe në përkthim.
“Mos lemë nam, drafti ka gabime të shumta”, iu drejtua Bushati, anëtarëve të Komisionit të Jashtëm.
Por jo vetëm kaq, Bushati ka thënë se një dokument të tillë nuk e ka miratuar asnjë Parlament kombëtar i ndonjë vendi.
“Që në titull ne kemi një gabim, po pa pasur një mendim të qeverisë dhe të Parlamentit nuk dua të futem në këto ujra të trubullta. Unë kam bërë kërkime dhe kam parë vende të Ballkanit Perëndimor që nuk e kanë këtë rezolutë.
Qeveria shqiptare është përgjegjësia që koordinon disa institucione, qoftë ato që janë brenda sferës së drejtëpërdrejtë të saj por, edhe institucione të tjera. Duhet të kemi një dokument të thelluar nga qeveria shqiptare.
Të gjitha dispozitave që përcakton kushtetuta shqiptare dhe lufta për informacionin e klasifikuar. Dal te pyetja e dytë. Dua të them se që në titull ne kemi një gabim po nuk dua t’i hyj këtij diskutimi pa pasur qëndrimin e qeverisë shqiptare, nuk dua që komisioni të hyjë në hetime të tilla.
Unë e kam bërë kërkimin e duhur dhe kam vënë re se parlamentet kombëtare nuk kanë shkuar në këtë proces se natyra e tyre është demokratike. Mos harroni në vetëm pak javë më pas Shqipëria zyrtarizon marrjen e kryesisë së OSBE. Ne kemi marrë disa zotime aty.
Ne si komision duhet të dimë edhe qëndrimin e Sllovakisë edhe të Italisë dhe e fundit, këtu bie dakord me kolegun Gjoni, pasi ne kemi qenë në bashkëpunim me ta. Të gjithë ata që janë marrë me përkthimin e rezolutës, nuk është një përkthim korrekt. Rezoluta e PE ka mbi 120 dokumente që citon të KE”, u shpreh Bushati.
