Nga Boldnews.al
Këshilli i Lartë i Prokurorisë, në reagimin e parë pas atentatit ndaj prokurorit të Durrësit, Arjan Ndoja, kërkon nisjen e procedimit disiplinor ndaj këtij të fundit, pasi “kemi dëgjuar në media se ai ka studio ligjore”.
Për Këshillin e Lartë të Prokurorisë, nëse provohet se Ndoja ka studio ligjore, atëherë kjo përbën shkelje disiplinore. Gjithësesi, për të sqaruar situatën, KLP-ja kërkon nga Kryeprokurorja e Përkohshme, Arta Marku, të ndërmarrë procedimin disiplinor.
Ky reagim, tërësisht absurd i Këshillit të Lartë të Prokurorisë, duket që shkon në të njëjtën linjë me atë të kryeministrit Edi Rama dhe zëvendësit të tij, Erion Braçe, të cilët e kanë shndërruar emrin e prokurorit Arjan Ndoja në atë që ata e quajnë grupi “KÇK”-Kap Çfarë të Kapësh” në sistemin e drejtësisë.
Këshilli i Lartë i Prokurorisë, një institucion kushtetues dhe me aksese të zgjeruara në informacion, ka kërkuar nisjen e procedimit disiplinor, në bazë të “të të dhënave në media”, sipas të cilave Arjan Ndoja është drejtues i një studioje ligjore, fakt që përbën ndalim për prokurorët.
Megjithëse KLP nuk u referohet mediave konkrete, mbi të cilën është bazuar, duket se ditët e fundit ka lexuar më shumë ato pranë qeverisë. Pas atentatit ndaj Arjan Ndojës, disa media raportuan se, në mjetin e tij, u gjetën disa dosje hetimore apo thjeshtë “dosje gjyqësore”, referuar disa burimeve konfidenciale të tyre.
Nisur nga këto të dhëna, KLP ka krijuar dyshimin e fortë se Arjan Ndoja, krahas prokurorit, bën edhe punën e avokatit.
Por, ky hamendim i Këshillit të Lartë të Prokurorisë mund të ishte shuar lehtësisht, vetëm nëse do të kishin vullnetin për të kryer disa verifikime fare të thjeshta.
Automjeti, në të cilin gjendej prokurori Ndoja në momentin e atentatit, është në pronësi të bashkëshortes së tij. Gjithashtu, edhe disa dokumenta gjyqësore, të gjendura në bagazhin e automjetit, mund të jenë pikërisht në funksion të aktivitetit profesional të bashkëshortes, e cila është avokate.
“Boldnews.al” kreu disa verifikime të thjeshta në Qendrën Kombëtare të Biznesit (QKB). Në bazë të të dhënave, rezulton se Elderina Ndoja, bashkëshortja e prokurorit Arjan Ndoja, njëkohësisht edhe pronarja e automjetit që u gjend nën breshëri, është avokate.
Sipas ekstraktit të QKR-së, Elderina Ndoja është regjistruar si “Person Fizik”-Avokat, në 4 Shtator 2012. Pra, bashkëshortja e prokurorit ka rreth 7 vjet që ushtron profesionin e lirë të avokatisë.
Por, pavarësisht se ekstrakti i QKR-së është i aksesueshëm për këdo, përfshirë edhe zyrtarët e Këshillit të Lartë të Prokurorisë, struktura që merret me karrierën e prokurorëve ka preferuar t’u referohet disa raportimeve mediatike me “burim konfidencial”.
Ndërkohë, po në bazë të një kërkimi të thjeshtë në Qendrën Kombëtare të Biznesit, nuk rezulton që prokurori Arjan Ndoja të drejtojë studio ligjore.
