Rama ka reaguar pas arrestimit të Rredian Rrajës, si i implikuar në atentatin ndaj prokurorit Arjan Ndoja.
“Përshëndes me respekt punën e shkëlqyer të Policisë së Shtetit për zbardhjen e ngjarjes kriminale, ku u implikua edhe prokurori i Durrësit. Brenda muajit Ligji Special kundër personave të dënuar, akuzuar a hetuar brenda/jashtë vendit për krim të organizuar apo krime të rënda…”, shkruan Rama në një postim në Twitter.
Më tej, ai i rikthehet edhe akuzave ndaj njerëzve të drejtësisë të përfshirë në grupimin që ai e ka emëruar “KÇK” (Kap ça të kapësh).
“Dhe masat speciale kundër KÇK-së. Do t’i nxjerrim ‘ujë të zi’ foleve të krimit të organizuar dhe do të reagojmë frontalisht ndaj gjykatësve e prokurorëve të inkriminuar, që duan ‘të kapin ç’të kapin’, deri ditën kur kanë radhën e spastrimit nga Vetingu”, shkruan Rama.
Në këtë grup, KÇK, Rama ka futur edhe prokurorin e Durrësit Arjan Ndoja, i cili ishte një nga tre të plagosurit e atentatit të 1 nëntorit te mbikalimi i Shkozetit bashkë me Andi Malokun dhe Landi Muharremin.
Kryeministri Edi Rama dhe zëvendëskryeministri Erion Braçe e kanë sulmuar prokurorin, pasi ky i fundit firmosi urdhër-arrestin ndaj Liridon Pulës, ish-kreut të Kadastrës Durrës, për akuzën e shpërdorimit të detyrës.
