Kryeministri Edi Rama, i cili njëherazi zyrtarisht mban edhe postin e ministrit për Evropën dhe Punët e Jashtme, është thirrur për interpelancë në Kuvend lidhur me rastin e 11 vjeçarit Alvin Berisha, i cili ndodhet në kamp të Sirisë.
Kërkesa për interpelancë me ministrin e Jashtëm është depozituar nga ajo që njihet si “opozita e re”, ndërsa është parashikuar që ajo të mbahet të hënën.
Nuk dihet nëse vetë Rama do të japë shpjegime mbi masat që ka marrë qeveria, apo do t’ia delegojë këtë gjë Gent Cakajt, ministrit në detyrë, i cili në emërtimin zyrtar është zv.ministër.
Shtatë deputetë të opozitës parlamentare kërkojnë shpjegime nga Rama lidhur me rastin e Alvn Berishës, 11-vjeçarit që ndodhet i vetëm në kampet e Sirisë. Në interpelancën urgjente, Edi Rama do të duhet të përgjigjet nëse është i vërtetë pretendimi i Emisionit italian “Le Iene” që ambasadori shqiptar në Turqi Gent Gazheli nuk ka treguar vullnet për të qenë pjesë e operacionit për të sjellë djalin pranë të atit.
Pavarësisht se kreu i qeverisë shqiptare është shprehur se çështja e 11-vjeçarit shkon përtej çështjes së diplomacisë, ende nuk ka asnjë hap të bërë publik nga autoritetet shqiptare për rrugën që po ndjekin për të marrë fëmijët shqiptarë që ndodhen në kampet e ruajtura nga forcat kurde.
Afrim Berisha, i ati i 11 vjeçarit ka besim se qeveria shqiptare do të bëjë gjithçka për ta kthyer në shtëpi djalin e tij, por gjithashtu ka nisur edhe një peticion në internet për të mbledhur firmat që ti kërkojë Ministrit të Jashtëm italian Luigi di Maio që të veprojë për të rikthyer Alvinin pranë të atit në Itali.
