Përplasjet në degën e PS-së së Shkodrës dhe reagimet kundër shkrirjes së strukturave në këtë degë, duket se kanë detyruar Kryeministrin Edi Rama që të thërrasë një mbledhje urgjente me deputetët, kryebashkiakët dhe drejtuesit e degëve të Veriut.
Një ditë më parë, nga Shkodra në drejtim të kryeministrit Edi Rama, njëherazi edhe kryetar i PS-së, pati reagime të forta lidhur me vendimin për shkrirjen e strukturave të partisë.
Ish-drejtues të PS-së në Shkodër i kujtuan Ramës se strukturat partiake nuk janë domate që shkrihen edhe bëhen salcë, ndërsa e akuzuan se ka shpërfillur propozimet e tyre lidhur me kandidatët për kryebashkiakë, drejtorë të institucioneve vendore apo edhe për deputet.
Sekretari organizativ, Arben Pëllumbi, që njëkohësisht është edhe koordinator për degën e Shkodrës, duke folur pas takimit me dyer të mbyllura, pranoi faktin se kishte pasur debate, duke e cilësuar këtë si një konflikt personal të disa individëve.
