Policia italiane ka zbardhur vrasjen e 45-vjeçarit shqiptar, i identifikuar si Shpend Allushi, ndërsa autori i krimit, rezulton kunati i tij, Luan Zalta.
Ngjarja e rëndë ka ndodhur mëngjesin e së dielës në Nettuno të Italisë. Autori i krimit u arrestua nga policia. Kjo e fundit u njoftua për ngjarjen nga vetë autori, i cili ishte kamionist.
Mediat italiane raportojnë se 50-vjeçari priti në banesë mbërritjen e policisë, i cili u arrestua me akuzën e vrasjes.
Sipas mediave italiane, krimi ka ndodhur pas një konflikti familjar. Raportohet se Allushi kishte shkuar në banesën e kunatit të tij për të sqaruar një çështje.
Tentativa për të sqaruar sherrin në familje, degradoi në përdorimin e armës. Kunati i viktimës nxorri pushkën nga dollapi ku e mbante të fshehur dhe qëlloi me armë në drejtim të Shpend Allushit.
Ky i fundit humbi jetën menjëherë si pasojë e gjakderdhjes.
Gruaja e viktimës, ndërhyri dhe tentoi të ndalonte vëllain e saj. Gjatë përplasjes mes motrës dhe vëllait, pati edhe një të shtënë tjetër me armë zjarri, por për fat të mirë nuk u lëndua asnjë prej tyre.
