I riu që u gjet i vdekur mbrëmjen e së shtunës, 26 tetor 2019, pranë Urës së Dajlanit në Durrës, u përplas nga dy mjete njëri pas tjetrit ndërsa po lëvizte me motor.
Viktima 25 vjec, punonte si shpërndarës picash, dhe u godit fillimisht nga një autobus në autostradën “Tiranë-Durrës”, tek mbikalimi i këmbësorëve në Shkozet.
Motori i tij mbeti i bllokuar nën autobus, por trupin e të riut e mori zvarrë kjo makinë tip “Fiat Dukato” për disa dhjetra metra derisa e lëshoi pranë urës.
Pamjet e kamerave të sigurisë fillimisht ngritën dyshime për një vrasje, por policia e Durrësit arriti të sqarojë dinamikën e aksidentit horror dhe e rrëzoi këtë pistë.
Pas veprimeve në vendngjarje, blutë arrestuan drejtuesin e autobusit dhe të furgonit që përplasën njëri pas tjetrit 25 vjecarin.
Autobusin sipas Policisë e drejtontre një 54 vjecar nga Tirana ndërsa makinën tjetër një 49 vjecar nga Kruja.
“Arrestimi i F. T., 54 vjeç, banues në Tiranë dhe P. T., 49 vjeç, banues në Krujë u bë për shkak se në autostradën “Tiranë-Durrës”, tek mbikalimi i këmbësorëve në Shkozet, mjeti tip “Fiat Dukato” që drejtohej nga shtetasi F. T., dhe mjeti autobuz tip “Skania” që drejtohet nga shtetasi P. T., janë përplasur me motorin tip “Dajang”, me drejtues shtetasin R. B., 25 vjeç, banues në Durrës, i cili ka ndërruar jetë” informoi policia e Durrësit.
Dëshmia e shoferëve
Në dëshmitë e para për rastin, që të dy drejuesit e mjeteve kanë deklaruar se nuk e kanë kuptuar atë që kishin bërë. Shoferi i autobusit ka thënë se ai nuk e ka parë të riun me motor, por ka dëgjuar vetëm zhurmën në momentin e përplasjes.
Edhe 49 vjeçari që me makinë e mori trupin nga vendngjarja ka deklaruar se nuk ka kuptuar që po tërhiqte zvarrë një person derisa e hodhi pranë Urës së Dajlanit.
I riu sipas policisë ka ndërruar jetë menjëherë si pasojë e dy goditjeve të forta që pësoi
Aksidenti ndodhi rreth orës 20:10, të së shtunës në autostradën Tiranë- Durrës në afërsi të një karburanti, në Shkozet.
Ndërsa ndaj dy drejtuesve të mjeteve që shkaktuan aksidentin horror është ngritur akuza e shkeljes së rregullave të qarkullimit Rrugor. /Oranews/
