Presidenti Ilir Meta ka kërkuar reflektim pas dështimit me negociatat duke bërë një paralele me Maqedoninë e Veriut.
“Kemi reflektim në Maqedoni, përmes zgjedhjes, që tregon dhe pjekurinë e tyre. Edhe te ne duhet të kemi një reflektim të menjëhershëm dhe të lexojmë me vëmendje të gjithë detyrimet që duhet t’i kishim përmbushur dhe që duhet t’i përmbushim”, tha Meta në konferencën e përbashkët për shtyp me Presidentin e Maqedonisë së Veriut, Stevo Pendarovkski. Deklaratë që u lexua në disa media si një kërkesë e Metës ndaj Ramës për të dhënë dorëheqjen, siç veproi kryeministri i Maqedonisë së Veriut, Zoran Zaev.
Dorëheqja, megjithatë, nuk është konsideruar një opsion nga Rama, i cili ia ka hedhur fajin BE-së për mos-hapjen e negociatave.
“Duhet të forcojmë raportet dhe bashkëpunimin me vendet kritike, Francë, Holandë, Danimarkë, Spanjë, etj. Duhet t’i bindim për seriozitetin tonë. Nuk mjafton të themi Franca ka këto probleme të brendshme dhe po na përdor ne, nëse ne jemi një burim i shqetësimeve të brendshme të tyre, sa i takon krimit, azilkërkuesve. Ne duhet të reagojmë me shumë përgjegjshmëri dhe në mënyrë të besueshme, në mënyrë që këto shqetësime të shuhen në javët e muajt në vijim. Dhe të bëjmë të qartë që ndërsa jemi të gatshëm të përmbushim çdo detyrim, çdo ide tjetër dhe informale qoftë, çdo alternativë tjetër, është e papranueshme dhe është e padobishme”, shtoi Meta.
