Nga Boldnews.al
Qeverisja e tij i ngjan një bote surreale, ku ai beson atë që nuk ekziston, e mbi shfaqjen imagjinare, ngre kultin e individit, qeveris si diktator dhe shfaqet si modern. Pushteti i ka ikur, nuk e kontrollon, nuk e duan më, nuk e mbështet kush, me përjashtim të disa Rilindasve, ku shumë janë të “sëmurë kronik” nga propaganda, ndërsa të tjerë e duan sepse ai u jep mundësi të vjedhin, dhunojnë qytetarët dhe pastrojnë paratë e trafiqeve.
Është vetëm një qenie politike që shëtit me vulën e kryeministrit në xhep, por pushtetin në letra po e mban ai. Fryma ndihet kudo, kryeministri Edi Rama ishte një fatkeqësi kombëtare, por në një vend si Shqipëria që ende endet në ujërat e tranzicionit, ai ishte e vetmja qeverisje që nuk ishte provuar.
Atdhetarë të mirë dhe të ditur të viteve 1912-1924, pushtetarë të zotë, shtetbërës, por edhe autoritarë të theksuar në kohën e Zogut, diktatorë famëkeq e periudhës së të ligut Enver Hoxha, dhe 30 vite tranzicion mes kryeministrave që bënë reforma, apo edhe mbajnë mëkatet në disa raste për keqqeverisje, gjithsesi me pasoja të rënda për vendin.
Dukej një pazëll i plotësuar me karaktere e formë të qeverisurit, por vetëm një njeri haluçinativ nuk kishim provuar. Edi Rama, i tillë ishte, i tillë qeverisi dhe i tillë do të mbetet deri në frymën e fundit, politike apo të shpirtit.
Transformoi genin e një populli me qeverisjen e tij. Kriminelit i dha pushtet dhe e vendosi në ballin e parë për të qeverisur. Hajdutin zyrtar e mbajti pranë e më pranë. Vendin e nxorri në shitje, ku ai vendos kujt di ia japë pasurinë e vendit dhe sa është haraçi që duhet të paguajë.
Intelektualin e përbuzi, e mënjanoi, e detyroi të ikë dhe mbyllë gojë, veshë e sy. Qytetarin e mirë modest e përbuz, e shkel çdo ditë me këmbë me politikat e tij. E dhunon deri në palcë, luan me të, kënaqet nga fatkeqësia qytetare që mbolli dhe rriti vetë, duke krijuar pushtetarin gjenetikisht të modifikuar, një qenie mes gjakut komunist të miksuar në krijimin e njeriu të ri Rilindas.
Ai i do të gjithë si vetja dhe fatkeqësisht ka bërë shumë të tillë. Sot opozita po intensifikohen kërkesën për dorëheqjen e kryeministrit Edi Rama. Po përdor ende metoda mëse demokratike, duke kërkuar largimin e tij, mbajtjen e zgjedhje parlamentare dhe lokale njëherësh, por me garancinë se do të jenë të lira dhe ndershme.
Opozita në bllok ndoshta ende nuk po e kupton thelbin e situatës, e keqja duhet flakur, kanceri duhet hequr dhe jo mbajtur me “qetësues”, pasi në çdo kohë aktivizohet, sulmon dhe vdes çdo qelizë të gjallë. Në këtë rast infekton një popull…
Ti kërkosh sot kryeministrit Rama dorëheqjen dhe dërgimin e vendit në zgjedhje të parakohshme Parlamentare është amnistia më e madhe që po i bëhet Edi Ramës. Sigurisht në një situatë të tillë, nëse do të kishte fare pak sensin e të kuptuarit dhe nga bota haluçinative të kthehej vetëm pesë minuta në realitet, i pari veprim që do të bënte do ishte dorëheqja e tij. Në radhë të parë për të mirën e vetes, pasi vetëm në këtë mënyrë do e shpëtonte vendin nga një katastrofë më e madhe nëse vijon të mbajë me çdo kusht karrigen e tij kryeministrore.
Rreziku i madh është se njerëzit, të lodhur fort, të bombarduar papushim nga “predhat” e propagandës, kanë nisur të qeshin me kryeministrin. Nuk e marrin seriozisht, as brenda dhe as jashtë vendit. Liderët europianë e trajtojnë si një klloun që gjithnjë jep një shfaqje: të vardiset nga pas, tenton të dalë në ballë të fotografive zyrtare, vishet çuditshëm për të tërhequr vëmendje, por fatkeqësisht ky klloun është kryeministër i një vendi.
Duhet larguar sot dhe jo ti luten për dorëheqje, vlera e një akti dorëheqje do ishte efektive vetëm nëse do ishim një vend qoftë edhe me fare pak demokraci. Shqipëria në qeverisjen e viteve 2017 deri më tani nuk bën pjesë në asnjë sistem politik, as totalitarizëm, as autoritarizim, sigurisht jo demokraci liberale, apo qoftë edhe hibride. Jemi në një sistem unikal që deri më sot nuk ka asnjë emër, ndoshta mund të quhet “çmendokraci”, por edhe kjo ha debat.
