Nga Boldnews.al
Prokurori i Durrësit, Afrim Shehu, deklaroi se arrestimet e fundit të rreth 20 ish-zyrtarëve të Hipotekës së Durrësit dhe shtetasve të tjerë, nuk ka asnjë lidhje me vjedhjen e zyrës së tij, ngjarje e ndodhur në Maj 2018.
Prokurori Shehu, i cili u shfaq në një konferencë për media paraditen e së Premtes, në krah të Drejtorit të Policisë së Durrësit, Lorenc Shehu, u përball menjëherë me pyetjen nëse hetimi që u pasua me 20 arrestime kishte lidhje me bastisjen e zyrës së tij.
Prokurori u përgjigj se “dy ngjarjet nuk kanë lidhje me njëra-tjetrën”, pa dhënë shpjegime të mëtejshme. Por situatat duket se kanë lidhje mes tyre.
Më shumë se një vit më parë, “Boldnews.al” ka publikuar një artikull mbi dyshimet për “vjedhjen” në Prokurorinë e Durrësit, e konkretisht në zyrën e prokurorit Afrim Shehu. Dyshimet për bastisjen e zyrës së prokurorit lidheshin kryesisht me hetimin për abuzimet me tokat në Ishëm dhe në zonën e Gjirit të Lalzit.
Në 24 Maj 2018, “Boldnews.al” raportoi, si më poshtë:
Prokuroria e Durrësit ka rënë pre e grabitjes për të dytën herë brenda 10 ditëve, duke krijuar dyshime të forta se është diçka e organizuar më së miri.
Mëngjesin e së enjtes është konstatuar se është vjedhur zyra e prokurorit Afrim Shehu, pjesë e Task-Forcës “Forca e Ligjit”. Gjatë vjedhjes, të ndodhur gjatë natës, prokurorit Shehu i janë marrë të gjithë dosjet hetimore, kompjuteri dhe materialet në kasafortën e tij. Gjithashtu, e njëjta bastisje ka ndodhur edhe në zyrën e një oficeri të Policisë Gjyqësore, i cili punonte për prokurorin Afrim Shehu.
Qartësisht, objekt i vjedhjes ka qenë vetëm zyra e prokurorit Shehu, pasi, sipas burimeve të “Boldnews.al”, nuk është prekur asnjë zyrë tjetër.
Prokurori Afrim Shehu ka qenë prej vitesh pjesë e Task-Forces Antikorrupsion në Prokurorinë e Durrësit. Pak muaj më parë ai u lëviz nga ky seksion, për shkak të vonesës së gjatë në kryerjen e veprimeve për dosjet kundër korrupsionit dhe sidomos për skandalin e tjetërsimit të tokave në bregdetin e Ishmit.
Prokurori Shehu u rikthye në Task-Forcen Antikorrupsion me firmën e ish-drejtueses së Prokurorisë së Durrësit, Donika Prela. Më tej, ai u caktua te njësia e re, “Forca e Ligjit”, duke iu rikthyer sërish dosja hetimore e tokave në Ishëm.
Burime nga Policia e qytetit bregdetar thanë për “Boldnews.al” se, pikërisht kjo dosje duket se ka qenë objekt i vjedhjes gjatë natës në zyrën e prokurorit Shehu. Ka një pikëpyetje shumë të madhe, sipas uniformave blu në këtë vjedhje, pasi rezulton që grabitësit nuk kanë thyer derën e jashtme të ndërtesës.
Gjithashtu, për policinë, janë krijuar dyshime se vjedhja është “e organizuar” pasi, edhe në vjedhjen e postës sekrete të prokurorisë së Durrësit, pak ditë më parë, gjendeshin, ndër të tjera, edhe materiale që do t’i dorëzoheshin prokurorit Afrim Shehu.
