Kryeministri i Maqedonisë së Veriut, Zoran Zaev njoftoi shpalljen e zgjedhjeve të parakohshme këtë të shtunë, një ditë pas vendimit të Këshillit Europian për mos-hapjen e negociatave me BE-në.
Por, a do ta ndjekë kryeministri Edi Rama shembullin e homologut maqedonas?
Për këtë u pyet Gent Cakaj, i ngarkuari me punë në krye të Ministrisë së Jashtme, në konferencën për mediat.
Cakaj mohoi se Rama do të japë dorëheqjen. Ai tha se kryeministri apo askush nga qeveria, s’kishte premtuar se negociatat do të hapeshin.
“Disa gjëra për sqarim, diskutimi për zgjedhje në Maqedoni është më i hershëm sesa dje, ndaj s’mund ti ndërlidhim. Ky diskutim s’ka ardhur si rrjedhojë e vendimit të këshillit. Në Maqedoninë e Veriut ka pasur zotime se ky proces që ky proces do ndodhë pashmangshëm dhe është thënë më herët se do të kishte dorëheqje nëse nuk do hapeshin, ndaj përgjegjësia elektorale është tjerër. Unë, apo kryeministri ose ndonjë përfaqësues i qeverisë ka premtuar se negociatat do hapen. Ne kemi thënë se jemi zotuar se do bëjmë përpjekje, por jo për të dhënë përfundimisht rezultatin që kemi pritur”, tha Cakaj.
Ne kemi plotësuar kushtet për hapjen e negociatave, këmbënguli Cakaj.
Pavarësisht deklaratave, kujtojmë se kryeministri Edi Rama ka shpallur një vit më parë se Shqipëria e kishte marrë datën e hapjes së negociatave. Deklaratë, që në fakt rezultoi e gënjeshtërt.
