Pas vendimit të Zoran Zaev për të çuar vendin në zgjedhje të parakohshme, ka reaguar ish-ministri Ylli Manjani.
Ky i fundit dhe pse tregon se nuk ka simpati për politikanin, vlerëson veprimin e tij të fundit, e cila sipas parashikimeve të ish-ministrit do t’i sjellë fitoren. Manjani vijon më tej në reagimin e tij duke ironizuar situatën e krijuar dhe duke theksuar mungesën e përgjegjësisë për politikanët shqiptarë, pas dështimit me hapjen e negociatave.
Statusi i ish-deputetit Ylli Manjani
Për Zaev nuk kam ndonjë respekt. Përkundrazi, pas përgjimit kurth që i bënë humoristët Ukrahinas, më krijoi një ndjesi neverie me mënyra si fliste e impostohej si leader i madh rajonal.
Por është politikan i përgjegjshëm para popullit të tij. Mori përgjegjësi politike megjithëse Maqedonia ishte për negociata pa kushte me BE. Nuk u kthye në Shkup të tregojë përralla me gjermanë e francezë, por dha dorëheqjen dhe fton popullin të vendosë.
Kam idenë se do jetë fitues në zgjedhjet e parakohshme, sepse në fakt popujt e dinë ta vlerësojnë përgjegjshmërinë në politikë.
Këtu tek ne doli vërtetë dielli, por dritën e ka lëshuar në Maqedoni… Me këtë dritë rriten specat e perimet atje të hamë ne këtu dhe i shesim pordhë europiane njëri-tjetrit…
Nuk është me të thënë jo! Është me të dhënë kjo punë! Lum kujt ja ka dhënë perëndia virtytet e punës, mirnjohjes, përuljes dhe përgjegjësisë.
Doli dielli posi! Doli bashkë me brengën…
