Partizani bëri një nisje të keqe kampionatit, ku përveç rezultatit negativ, 1-0 në favor të Kukësit, të kuqtë kanë humbur edhe shërbimet e një lojtari për ndeshjen e radhës në kampionat. Partizani u “tradhtua” nga sulmuesi Theofilus Solomon, i cili hyri si zëvendësues në pjesën e dytë, por pas 17 minutash humbet kontrollin dhe godet me kokë Lulajn e më pas del me karton të kuq.
Trajneri Lerda e hodhi nigerianin në fushë me shpresën për të përforcuar sulmin dhe për të kaluar disavantazhin, por misioni i sulmuesit shkoi për keq. Solomon ndihet i zhgënjyer me veprimin e bërë dhe përmes një postimi në profilin e tij i ka kërkuar falje ekipit, trajnerëve dhe tifozëve për gabimin e bërë, që e quan të paqëllimshëm.
“Me sinqeritet i kërkoj falje ekipit, trajnerëve dhe tifozëve. Më vjen keq për atë që ndodhi shpejt gjatë ndeshjes. Isha i përqendruar te ndeshja dhe nuk kisha qëllim që të merrja karton të kuq. Më vjen vërtet keq dhe shpresoj që djemtë do të më falin mua dhe të fokusohemi te ndeshja që kemi përpara. Forca Partizani”, shkruan Solomon në postimin e tij ku kërkon falje për kartonin e kuq që mori ndaj Kukësit.
DENONCO