Kokëulur, me duar në kokë dhe me shenja nervozizmi. Kështu e pritën vendimin e masës së sigurisë 4 të arrestuarit e parë lidhur me vrasjen e 26-vjeçarit, që 3 ditë më parë u qëllua me plumb në kokë, ndërsa po punonte si teknik kondicioneri në një vilë që po rikonstruktohej.
Indrit Çela, u qëllua me një plumb në kokë, duke humbur jetën në spital, ndërsa policia shpalli në kërkim vëllezërit Kusi.
Gjykata Penale e Tiranës vendosi sot që Bujar Kusi, Ferdinant Bakalli dhe Ali Sula të qëndrojnë në burg deri në përfundimin e hetimeve.
Ndërsa për Luan Çaka u dha vendimi “arrest në shtëpi”.
Në momentin e nisjes së seancës, por edhe më pas, të pandehurit kanë qëndruar me kokën ulur, hera herës vendosnin duart në kokë dhe shfaqnin shenja nervozizmi.
