Opozita e bashkuar ka njoftuar zhvillimin e një proteste kombëtare më 2 qershor. Protesta do të mbahet pasditen e së dielës (ora 19:00) në bulevardin “Dëshmorët e Kombit”, përballë godinës së Kryeministrisë.
Kjo do të jetë protesta e 7 kombëtare e opozitës së bashkuar që prej 16 shkurtit, ndërsa kërkesa mbetet e njëjta: Rama ik.
Opozita kërkon largimin e Edi Ramës nga posti i kryeministrit dhe krijimin e një qeverie tranzitore që do të përgatisë zgjedhjet e parakohshme parlamentare.
Në të gjitha protestat e zhvilluara deri më tani, Edi Rama ka preferuar të mos qëndrojë në zyrë, pavarësisht se edhe vetë opozita ka zgjedhur zhvillimin e protestave në fundjavë, të shtunave ose të dielave.
Këtë rradhë, sërisht Rama ka zgjedhur të mos jetë jo vetëm në zyrën e tij, por as në Tiranë.
Mësohet se kryeministri ka zgjedhur të kalojë të dielën në Lezhë, ku do të prezantojë kandidatin e Rilindjes për kryebashkiak, Pjerin Ndreu.
Kështu një ditë pas çeljes së fushatës për zgjedhjet vendore të 30 qershorit, Rama do të shkojë drejt Lezhës, duke zgjedhur Ndreun si kandidatin e parë të Rilindjes që do të prezantojë.
