Edi Rama duhet të mendojë për trashëgiminë e tij politike. Është kjo këshilla që i ka dhënë Arben Malaj, ish-deputet i PS-së, kryeministrit Edi Rama.
Malaj tha se Ramës nuk poi kërkohet të ikë nga Partia Socialiste, as të ikë si deputet, por të tërhiqet dhe t’i japë vendit një zgjidhje.
Ish-deputeti i PS-së tha se vendi po shkon drejt një situate të ngjashme me atë të vitit 1996.
“Gjëja e vetme që shpëton ekonominë është ulja e riskut politik. PS sot po mendon njëlloj si PD në 1996, që hajde të fitoj zgjedhjet dhe pastaj e zgjidhim situatën. Por kjo nuk zgjidh asgjë”, tha Malaj.
Sipas tij, vendi duhet të shkojë një orë e më parë me një qeveri tranzitore, pa pasur asnjë dëshirë personale për të marrë pjesë në të.
“Rama duhet të kuptojë se qeverisja është diçka e vështirë, duhet të pyesë vetveten e tij, nuk mund të qeverisë me njerëz që i thonë ty të ka zgjedhur Papa, ti je më i miri, etj etj. Në këtë vend është vrarë shpresa, studentët duan të ikin, më vjen turp kur jap mësim, sepse studentët të shikojnë në sy dhe shikon se i janë vrarë ëndrrat. Ti ke marrë një mandat politik, qerverisja nuk është batuta, i duhet të marrë përgjegjësitë”, tha Malaj.
