Abuzimi/ Polici rrugor “kaubojs” i Kavajës, gjobë absurde qytetarit (Foto e video)

Nga Boldnews.al

Një polic rrugor në Kavajë, Gjergj Koliqi, pas “24 orë pa gjumë”, ka vendosur të “zbavitet” me drejtuesin e një automjeti, duke i bllokuar patentën në mënyrë tërësisht abuzive.

“Boldnews.al” ka marrë një denoncim nga një shtetas, i cili ka preferuar të mos i publikohet emri, në të cilin tregon me fakte dhe prova për situatën absurde me të cilën ai është përballur me punonjësin e policisë Koliqi dhe dy kolegë të tij.

Paraditen e 16 Majit 2019, qytetari denoncues ka qenë duke qarkulluar në rrugën dytë Mali i Robit- Qerret. Në një pjesë të rrugës, me vija të ndërprera, ai ka parakaluar një automjet policie, i cili po ecte shumë ngadalë dhe pa sinjale akustike të ndezura.

Rreth 1 kilometër më pas, automjeti i policisë i është afruar mjetit të qytetarit dhe, nëpërmjet dritave dhe sirenave i ka bërë thirrje për të ndaluar.

Nga mjeti i policisë ka dalë efektivi Koliqi, i cili e ka vënë në dijeni qytetarin se “kishte parakaluar gabim”.

Pas kundërshtimit të qytetarit, Koliqi duket se është zmbrapsur dhe i ka thënë se do të gjobitet, për shkak se “pasagjeri në sediljen e pasme” ka qenë pa rripin e sigurimit.

Edhe ky pretendim i policit është rrëzuar nga qytetari. Kjo, për faktin se pasagjeri ka pasur të vendosur rripin e sigurimit dhe, për më tepër, polici që ka qenë në lëvizje, nuk ka pasur asnjë mundësi reale për të parë rripin e pasagjerit në një tjetër automjet që lëvizte.

Pasi iu rrëzuan dy “pretendimet”, efektivi Koliqi ka “zbuluar” një shkelje të tretë. “Ke ndryshuar strukturën e automjetit, pas nuk ke sediljet e pasme”, i është drejtuar ai qytetarit. Ky i fundit, tashmë i bezdisur shumë nga këmbëngulja e policit për ta gjetur në shkelje, i ka treguar se sediljet nuk ishin hequr, por vetëm ishin ulur.

LEXO EDHE  Njëlloj si komunistët, Rilindasit shpërndajnë trakte nëpër Tiranë/ Gazetari: Ja çfarë gjeta brenda zarfit ...

Pas minutave të tëra në rrugë, në ndihmë të efektivit Koliqi janë afruar edhe dy kolegë të tij. Këta të fundit i sugjeronin qytetarit që të paguante gjobën dhe secili të vijonte punën e tij.

Të njëjtën kërkesë kishte edhe polici rrugor Koliqi, i cili i drejtohet qytetarit se “paguajë gjobën djalë dhe mos na lodh shumë, se kam 24 orë pa gjumë”.

Qytetari, i lodhur nga komunikimi absurd me policët rrugorë, të cilët “donin muhabet”, vendos që të nënshkruajë fletën e gjobës duke shënuar “nuk jam dakord”. Fleta e gjobës në fakt nuk kishte vlerë financiare, por ishte “bllokim patente”.

Në këtë mënyrë, polici me “24 orë pa gjumë” vendosi që qytetarit t’ia hiqte në mënyrë tërësisht të padrejtë lejen e qarkullimit, vetëm për faktin se nuk pranonte që të dilte “blof” nga ajo bisedë e gjatë me drejtuesit e mjetit privat.

Menjëherë pas kësaj situate skandaloze, qytetari i është drejtuar Zyrës së Shërbimit për Çështje të Brendshme dhe Ankesa në Policinë e Shtetit, në të cilën paraqet të gjithë rastin me detaje, përfshirë edhe foto e video të vendit ku ndodhi biseda e çuditshme me efektivët e Policisë Rrugore.