A do e përdorë Edi Rama ushtrinë në ditën e zgjedhjeve…

Nga Boldnews.al

Mazhoranca dhe opozita po shkojnë drejt 30 qershorit, ditës kur në bazë të dekretit të Presidentit të Republikës do të mbahen zgjedhjet lokale, me një situatë tensioni dhe krize politike.

Në njërën anë, opozita e cila ka dorëzuar mandatet e deputetëve dhe nuk është regjistruar as për zgjedhjet lokale, ka deklaruar se në 30 qershor nuk do të ketë zgjedhje. Ndërsa qeveria insiston në mbajtjen e zgjedhjeve me argumentin që ato nuk mund të shtyhen pasi nuk e lejon Kushtetuta.

Duket se situata aktuale është një lojë nervash me disa përplasje të vogla në protestat e zhvilluara nga opozita, ku njëra palë jep ultimatumin e mbajtjes së zgjedhjeve dhe tjetra atë të bllokimit të procesit.

Po a mundet që në 30 qershor të mbahen zgjedhje, duke respektuar standardet?
Numri i qendrave të votimit dhe KZAZ-ve arrin në mbi 5700, çka do të thotë se për t’i ruajtur ato nga momenti që shkojnë materialet zgjedhore dhe deri sa merren në dorëzim nga Komisionet e Qendrave të Votimit, duhen së paku 5700 policë.

Në total numri i policëve, të paktën sipas shifrave të shkurtit 2019, është rreth 10985. Kjo do të thotë se në ditët e zgjedhjeve do të jenë të paangazhuar rreth 5200 policë për të gjithë vendin.

Por referuar mënyrës sesi janë shpërndarë në komisaritet dhe drejtoritë vendore, shumë nga zonat mbeten me një numër minimal policësh.

Deputeti Lefter Maliqi tha se në qarkun e Fierit janë 600 policë, ka 580 qendra votimi, çka do të thotë se në gadishmëri policisë i mbeten 20 policë. Maliqi tha se nëse ndodhin njëkohësisht 4 apo 5 incidente, policia nuk mund të garantojë dot rendin, duke argumentuar në këtë mënyrë sepse nuk mund të mbahen zgjedhjet.

LEXO EDHE  Kryemadhi takon kongresmenët, Joe Willson dhe Jim Costa: Shprehu gadishmëri për të nxitur ...

Dhe po të kihet parasysh fakti se Fieri është qarku më i madh pas Tiranës, atëherë në qarqet e tjera ka një numër më të reduktuar punonjësish policie, ndërsa qendrat e votimit lëvizin me një diferencë më të vogël.

Në kushte të tilla, nëse qeveria do t’i shkojë deri në fund idesë për zhvillimin e zgjedhjeve me një situatë krize politike, atëherë mund të angazhohet ushtria.

Në zgjedhjet e mëparshme, forcat ushtarake, kryesisht ato të Batalionit të Sigurisë, angazhoheshin për mbrojtjen e institucioneve. Por në kushtet kur policia nuk do të mund të garantojë qoftë edhe fizikisht procesin, mund të shkohet drejt angazhimit të ushtrisë. Kjo do të përbënte një rast të paprecedent, të pandodhur më parë, dhe që do të përshkallëzonte krizën.

Nëse në një moment qeveria do të vendoste angazhimin e ushtrisë për mbrojtjen e qendrave të votimit dhe KZAZ-ve, së pari do të shkelej kushtetuta dhe zgjedhjet do të ishin të rrëzuara ligjërisht dhe moralisht.

Pak kohë më parë, qeveria vendosi që aeroporti i Rinasit të merrej në ruajtje nga trupat komando, duke e argumentuar këtë me cënimin e sigurisë kombëtare, në rastin e grabitjes së miliona eurove në pistën e aeroportit.

Opozita reagoi duke e cilësuar vendimin anti-kushtetues, pasi angazhimi i ushtrisë kërkonte vendim nga Parlamenti dhe jo nga Qeveria. Gjithsesi Qeveria nuk i tërhoqi komandot nga aeroporti. Një gjë të ngjashme Rama mund ta bëjë edhe në ditët e zgjedhjeve, ku forcat e ushtrisë mund të marrin në ruajtje KZAZ dhe KQV dhe policia me apo pa gaz, të jetë si një forcë e gatshme për Rilindjen.