Kreu demokrat Lulzim Basha do të ketë një agjendë të ngjeshur takimesh ditën e sotme në kuadër të përcaktimit të një strategjie lidhur me protestat e opozitës.
Burimet bëjnë të ditur se pritet një intensifikim i aksionit opozitar në kushtet kur kryeministri Edi Rama nuk dëgjon zërin e qytetarëve.
Pas djegies së mandateve të deputetëve, ka pasur propozime nga kryetarë dhe ish-deputetë për djegien edhe të mandateve të kryetarëve të bashkive dhe këshilltarëve, çka do të thellonte edhe më shumë krizën politike.
Në orën 11:30, Basha do të zhvillojë një mbledhje me Kolegjin e Kryetarëve në selinë blu.
Më pas në 13:00, kryedemokrati do të ketë një mbledhje me kryetarët e bashkive të djathta.
Pasdite në 17:00, Basha do të zhvillojë një mbledhje të përbashkët me Kryesinë e PD-së dhe grupin parlamentar.
“Nesër kam thirrur forumet e PD me një konsultë për axhendën e aksionit politik dhe protestave të qytetarëve të bashkuar. Ky është momenti për të intensifikuar dhe për te vazhduar me vendosmëri betejën tonë”, deklaroi Basha një ditë më parë.
Në fundjavë Basha do të udhëtojë drejt Londrës, ku është i ftuar nga Parlamenti britanik dhe Partia Konservatore.
Prej 16 shkurtit dhe në vazhdim, opozita ka protestuar dhe ka aplikuar forma të mosbindjes civile për të detyruar kryeministrin Edi Rama të dorëhiqet dhe të krijohet një qeveri tranzitore që do të garantojë zgjedhjet parlamentare.
