VIDEO/ U dhunua te Parlamenti, ja si i mbrojti policët te Kryeministria, Sahit Dollapi

Sahit Dollapi, Sekretari Organizativ i PD-së, u dhunua nga disa efektivë të repartit special të FNSH-së, në protestën që opozita organizoi të shtunën pasdite.

Ndoshta ky ishte incidenti më i rëndë i protestës, ku më pas nuk munguan aktet e dhunës së policisë ndaj qytetarëve, aq sa zona rreth Parlamentit dhe Drejtorisë së Policisë së Tiranës u kthye në një shesh-beteje, me një ndotje të lartë për shkak të sasisë së madhe të gazit të hedhur nga policia.

Nga video që tregon momentet e dhunës së Dollapit, shihet se Sekretari Organizativ i PD komunikon me një drejtues të FNSH, duke iu prezantuar, por pas disa sekondash ai urdhëron shoqërimin apo ndalimin e zyrtarit demokrat. Në këtë moment disa efektivë të FNSH turren drejt Dollapit, i cili vrapon për tu larguar, por rrëzohet dhe më pas i shtrirë në tokë qëllohet me shkopinj gome.

LEXO EDHE  Rritja e çmimit të naftës/ Plasin memet në rrjet (FOTO)

Policia nuk dha ndonjë sqarim lidhur me incidentin, ndërsa justifikimi i dhënë nga kryeministri Rama apo ministri Lleshaj, ishte se policët kishin 7 orë në protestë, dhe u qëlluan me Molotov, gurë, shashka nga protestuesit.

Në fakt, në videon e mëposhtme shihet qartë se përgjatë protestës, Dollapi është munduar të shmangë në maksimum konfrontimin mes protestuesve dhe policisë.

Madje kur protesta ishte përpara kryeministrisë, Dollapi qëndronte brenda rrethimit që kishte përcaktuar policia, dhe në një moment ka ndërhyrë kur një protestues tentoi të kalonte gardhin metalik, duke mos e lejuar atë.